農曆新年前夕，李家因車禍失去五歲的稚女李津兒，鍾家因工業意外痛失四十七歲的鍾樹根，蘋果基金即撥款，助他們支付殮葬費用。近日，兩個貧困家庭皆接獲善長慷慨捐款，助紓其經濟壓力。
「𠵱家心情始終重未平復到，好想盡量想開啲，但係每次見到細女嘅時候，又會令我更加懷念津兒，我個心覺得好酸，睇住個女咁樣走咗，呢件事對我嘅打擊好大，真係好唔捨得囡囡。」津兒因車禍去世已個多月，惟其母阿茵至今仍未能接受愛女枉死的事實，腦海不時泛起女兒生前的點滴片段。
津兒性格活潑好動，深得父母疼愛，月前，她騎着心愛的單車與家人前往公園遊玩，正當她和家人站在安全島之際，詎料，一名司機疑不小心駕駛鏟上安全島，津兒當場斃命。
二十五歲的阿茵從事鞋店售貨員，除育有津兒之外，尚有一名三歲的女兒；丈夫則任職地盤及裝修散工，惟已失業多月。婚後，夫婦與家翁及家姑同住，其家翁任職保安員，月入微薄，經濟十分拮据。貧困的李家無力支付殮葬津兒的費用，蘋果基金曾從「殮葬專戶」撥款一萬五千元，以解燃眉之急。早前，記者另把讀者捐款一萬七千八百五十元轉交給阿茵。
「經歷過呢件事之後，我好感激區議員、律師同埋部份政府部門嘅義務幫助，而善長嘅捐款，亦令我體會到呢個社會原來重有咁多熱心人士幫助，𠵱家老公失業，呢筆錢可以用嚟幫補生計。」容顏憔悴的阿茵由衷地說。 捐款編號：C0807
今個新年，對於新寡鍾太來說，別有一番滋味在心頭。
「往時每逄農曆新年，樹根一定帶我同幾個細路返鄉下探吓奶奶，熱鬧吓；但今個新年，就得番我幾仔乸孤伶伶，奶奶知道樹根過咗身，佢老人家都好傷心。」鍾太哽咽着說。
四十七歲貨倉工人鍾樹根，月前在搬遷木板時，疑遭十多塊擺放不穩、共重近五百磅的木板塌下來擊中，即時頭破血流，送院搶救後返魂無術，遺下妻子及三名年齡介乎十二至十六歲子女，仍在求學階段。
聲音沙啞的鍾太表示：「到𠵱家，廠方、勞工處、警方都未有一個滿意答覆畀我，每次我諗起樹根死得咁冤枉，我就好心痛，瞓唔安、食唔落。」
失去至親，鍾太除傷心欲絕外，因家境困難，曾更一度為殮葬費憂心，蘋果基金較早前曾於「殮葬專戶」撥款一萬元予以協助，近日另將合共一萬三千零七十元的善款轉交給她。
「樹根突然間去咗，我真係好彷徨，自己有肝病、糖尿病做唔到嘢，每個月要買藥，又要供養三個細路哥，開支真係好大，𠵱家我暫時都係用緊僅有嘅積蓄生活，呢筆善款真係幫輕我好多，多謝晒。」捐款編號：C0793
暖流熱線
電話:29908688
傳真:23702192
電郵:
網址：
