八方聽聞立法會有班議員最近正密謀私訪麻雀館，不過並唔係麻雀癮起想去打番四圈，而係微服體察民情，以供立法時作參考。
話說條《2002年職業性失聰（補償）（修訂）條例草案》立法會傾咗好耐，有關新增嘅四個指定高噪音工作，其中包括屠房電殛豬隻範圍工作嘅員工、酒保及的士高打碟員，爭議不大。不過第四樣「全職受聘麻雀館『戥腳』打麻雀的員工」，就被質疑點解唔包埋麻雀館巡場？
政府擺出喺麻雀館做嘅噪音測試結果，話戥腳身上嘅感應器平均錄得91分貝，啱啱超過法定嘅90分貝水平；巡場則唔好彩，只有88分貝。好多議員都大吃一驚，頻說冇理由。鄭家富重話要親自去麻雀館考察吓，勞永樂、李鳳英同陳國強幾個紛紛附和。
呢吓又輪到政府啲官員極力勸阻，梗係啦，尊貴的議員到訪三山五嶽人馬滙聚嘅麻雀館，大吉利是講句，班議員有乜冬瓜豆腐，都唔知邊個孭鑊。不過鄭家富幾個一於好少理，計劃靜靜雞去竹館行一轉，所以大家第日若喺麻雀館見到呢班立法會議員行來行去，唔使驚訝，佢哋都係去做嘢啫！
傳真︰2623-9278
電郵︰