今回「用車報告」主角周太，係以一部歐寶Zafira作座駕；佢使用汽車嘅次數，可謂令人難以想像，出車至今只有短短四個月時間，行車里數就已經高達一萬二千多公里，所以作為一份「用車報告」，佢嘅評語可算係非常有力呢！
記者、攝影：郭信強
其實，周太喺決定選擇歐寶Zafira作座駕之前，亦曾到過其他汽車陳列室，睇過現代Trajet同埋本田Stepwgn，並曾作出比較；「到最後我都係覺得，Zafira嘅車廂設備較其他同級車來得實用，車架又見紮實，可以畀到我有一份安全感外，最重要係售價亦要較同級車款來得便宜，所以我咪揀Zafira囉！」周太笑着說。
已為人母嘅周太，每天大清早都要接送三名子女，由石崗家中往九龍上學，到下午又要先接幼女回家，然後再到九龍接其餘兩名子女放學，而汀九橋更成為周太往返石崗同九龍之間嘅必經之路！「當遇到颱風襲港或颳大風時，汀九橋會限制過橋車輛嘅高度，加上我每日要風雨不改來往石崗同九龍，接送子女返學或放學，一旦用上大型豪華MPV，喺呢類惡劣天氣下就可能要改道而行，因而躭誤接送子女嘅時間呢！」周太說。而歐寶Zafira車高剛好達汀九橋嘅車高限制，加上香港有好多室內停車場，只限於私家車停泊，但Zafira車高不足1.8米，咁就去邊個停車場泊車都無問題啦！
「但係，點解我會揀鮮紅色車身嘅Zafira？其實原因好簡單，就係因為想方便子女，能夠喺多部泊在學校門外等接放學嘅車輛之中，一眼望得出媽咪喺邊度等緊佢哋嘛！」周太說。
周太又認為Zafira嘅車廂夠闊落，三排七座位設計舒適，就算滿載乘客都仍覺鬆動，用上雙色真皮座椅亦能予人有高承托力及搶眼感覺；「不過我最欣賞都係佢後排座椅可以左右獨立收摺，咁樣可以將子女嘅書包放埋一齊；另外，重可以擺放較大型嘅行李呢！至於駕駛感覺，Zafira亦畀到我有一種歐洲車應有嘅紮實感覺，就算以高車速響公路上巡航，都唔會有『輕飄飄』嘅感覺；而一台2.2公升直4偈亦有充裕動力輸出，兼且重好慳油㖭！」
雖然車子已行咗一萬多公里（出車約四個月），但機件狀態仍然十分好，故此對歐洲車維修費貴嘅問題，周太並未有因此而擔心；同時，佢對代理服務質素亦給予頗高評價，除喺買車時，陳列室營業員殷勤有禮外，就連維修服務中心所提供嘅維修服務質素亦頗高，難怪周太會對此讚不絕口之餘，重介紹其中一位朋友選購全新歐寶Corsa作座駕啦！
歐寶Zafira2.2小檔案
近年，家庭七人MPV市場競爭日趨激烈，先後有多款新車在港推出；而德國歐寶亦唔例外，率先於2001年初引入備有實用車廂布局，同埋以1.8公升引擎作主打嘅Zafira抵港，並以約16萬元嘅價錢推售，深受車迷追捧。及後代理又於同年五月，再引入配用2.2公升直4引擎嘅Zafira抵港，並推出多款特別版供用家選購呢！
售價方面，以2.2型號為例，於2001年5月初推出時為$183,000起，但現時售價僅為$149,000；以唔使15萬嘅價錢，就可以買到部歐洲名牌家庭七人MPV，你話係咪好吸引呢？
引擎：2198cc直4DOHC
馬力：147ps/5800rpm
扭力：20.7kgm/4000rpm
尺碼：4317×1742×1634mm
軸距：2694mm；車重：1475kg
新車售價：$149,000
查詢：福方汽車（29888080）