上個禮拜個市嘅走勢麻麻地，跌吓跌吓咁去到9100，好多散戶見個市跌唔落去，開始出嚟買嘢，尤其係散戶至愛嘅股仔，就更加好似翻生咁，好似隻海爾中建（1169），就成為金魚缸最矚目嘅股仔，單係上星期四就升咗4成，成交重去到4億幾股。
真係估唔到海爾一句話就救番生成隻股仔，今次單交易，其實有好多嘢都重未落實，尤其係海爾會注啲乜嘢資產入去，同埋做完成個注資之後，究竟海爾最後會攞到幾多控制權，都未有人敢肯定。
伏勝為咗滿足好奇心，周圍打聽，但都係冇乜人知道實情，不過可以肯定嘅就係，隻股未爆消息出嚟嘅時候，已經有好多春江鴨出嚟搵食，個價由一毫二左右升上嚟，相信班春江鴨已經執唔少。要計今次賺得最勁嘅，都應該要數中建（138）嘅麥老闆，皆因當年佢都係用咗8位數字嘅銀碼嚟買隻「孖一六九」，𠵱家由「一生發」所持有嘅「孖一六九」就已經值成8億幾，我諗除咗當年阿楷仔隻盈動有咁勁之外，就無幾多隻可以同佢相比啦。
前一排朋友講過話會有後着嘅意科控股（943）喺上個星期又再郁番，重好似愈買愈勁咁，問番之前位好友有關意科古仔嘅時候，一講到幾時會再爆料就欲言又止，伏勝覺得似乎係有啲嘢發生緊。上個星期突然有好多大牌卜架加入戰團出嚟搶貨，成交連續兩日升上千幾萬，成個版面擺出個戰鬥格，伏勝知道應該好事近，所以大家不妨睇睇個勢，尤其個價喺上星期四已經升穿咗上次高位兩毫五，加埋對上無乜阻力位，如果下個星期再衝穿埋兩毫六，分分鐘可以直撲兩毫八附近水平。
伏勝