新春已過，仍有讀者來函，問羊年犯太歲之事；對流年吉凶犯太歲等事，香港人原來有好多人寧可信其有，不可信其無，左丁山唔係喺呢度宣揚甚麼迷信，只係反映現實啫，不信者，千祈咪鬧左丁山唔夠科學。
新春期間，K小姐與密友去荷李活道文武廟拜太歲。晨早就去，以為冇乜人，戴上太陽鏡，唔想俾人認得出。點知未夠八點，入文武廟嘅人龍已經排到出去荷李活道，具有相當知名度嘅密友為之站立不安，驚死附近有狗仔隊影相，卒之排咗半個鐘頭先至入到去拜，交低七十四蚊香油錢，成個安樂晒。點解拜太歲要去文武廟？K小姐講唔出理由，只係話習俗如此，佢都係聽前輩指點嘅啫，但既然有咁多人去，相信係好嘢啩！
左丁山記得初初入學讀書之前，老竇特登帶我由旺角過海，由統一碼頭行上文武廟，拜齊文武兩帝，書包仔內載一棵葱（聰明）、一本書、一個算盤仔（計數），祈求保佑讀書聰明伶俐。後來大學畢業，佢要我去叩頭還神。後來老竇臨終前，吩咐左丁山要記住呢個傳統，帶仔女入學前先去拜文武廟。呢啲事當然照辦，但拜神物品不妨追上時代，為仔女書包添加一本英文書、一個計數機，上香參拜之後，再叫佢哋摸吓文昌帝枝筆，於是大功告成。
W小姐問犯太歲者要戴乜嘢牌，呢件事曾經問過梁玳寧小姐，佢話銀製兔牌啱用喎。