俗語話「做生不如做熟」，但以下兩位小食店老闆卻大唱反調，他們是飲食業的門外漢，如此巿道無喇喇轉行，勇字背後還有「愛吃」二字作後盾，原來興趣才是主導，加上逆巿這機遇，造就了日式煎餅──風火山林，以及串燒新貴──大曼谷，現在且看這兩位前成衣界代表，在事業上如何破舊立新。
年紀輕輕的Dicky，過去曾經營時裝公司，雖然並非首次創業，但他坦言從未踏足過飲食界，今次膽粗粗學人在小食檔林立的旺角區賣鐵板燒，難道真的是初生之犢不畏虎？「開得檔梗係有信心，自己平時都鍾意入廚煮幾味，很早以前已打算進軍飲食業，就算𠵱家話經濟唔好，但買小食又不用花太多錢，點都會有其捧場客。」
不過，幸好Dicky有個幕後軍師在背後撐腰，開業以來一直平平安安。「今次開舖有很多地方都向我的日本朋友請教，佢本身在日本做鐵板燒師傅，每次來香港總會教我幾招，學學埋埋可以用在舖頭上，好似招牌菜牛肉堡，都係我呢個日籍朋友教路。」現時主力賣鐵板燒和串燒為主，款式維持在二十多種以內，以便控制品質。
店子的招牌菜，把牛肉碎、洋葱碎以鐵板烤熟，蘸少許沙嗲醬後，捲入烘熱的薄餅內，餅皮入口質感酥化，味道近似印度烤餅，牛肉碎以秘製醬汁醃過，相當惹味。
今期大熱的炒公仔麵，見過唔少茶餐廳賣成三十幾蚊碟，𠵱家街邊檔平足一半，配料方面有煙肉、蟹柳、香腸、雞翼等，價錢一律$16。
原條秋刀魚肉質鮮嫩，燒烤時以少許鹽吊味，已能將魚肉的鮮味帶出。
店名：風林火山
地址：旺角弼街70號地下
營業時間：下午12時至晚上11時
有髮型師男友的支持，加上從小愛吃街邊串燒，配合大師的贈言：「你五行屬火忌水，唔好開糖水舖，做燒烤呢類明火行業，最啱。」27歲的Rosanna由成衣採購轉為小食店老闆，以大路得嚟帶創意的小食配搭，在旺角打出名堂，回想開張頭半年，她腦海裏曾閃過「收檔」二字，「自問一向用靚料，不加味精，但捱了半年，自己無糧出才得到收支平衡；眼見賣魚蛋的，成本低多味精，重賺得多過我；實在不甘心！」不過想到要結婚買樓……等昂貴的人生大計，Rosanna惟有的起心肝，繼續開檔，咁幾時結婚呢？Rosanna笑笑說：「遲兩年先啦。」
第一次嚟食，揀咗魚餅，覺得幾得意吖，食落好爽口，下次會試其他嘢，因為我鍾意試新嘢。
豬頸肉切至極薄，豬頸肉捲着金菇自然惹味啲，加上即叫即燒，令爽口的金菇豬頸肉變成鎮店之寶。
先把雞髀起肉，並用泰式香料醃好雞髀肉，跟糯米飯同炒，熟後，把熱辣辣的糯米雞髀飯，釀番入雞髀當中，把雞皮一反，用竹籤一戳，就可排排坐在烤爐上，熱力迫走油脂，入口時就變成卜脆鹹香的雞皮，包着香軟的糯米飯，無怪乎可日賣200隻。
跟糯米雞異曲同工，以鮮魷魚筒取替雞皮，感覺上又無雞髀咁油膩，但味道卻一樣咁出色。
店名：大曼谷
電話：61233898
地址：旺角通菜街39號A1A舖
營業時間：中午12:00至凌晨1:30