梁詠琪（GiGi）自從與鄭伊健拍拖後，一顆心已無空間容納其他男士，縱使她與金城武、古天樂和劉德華等俊男合作，亦從未動過心。伊健聽到這番愛的宣言後，應該感到一萬個放心了！
三年多前，梁詠琪戀上鄭伊健，當時外界不清楚伊健跟邵美琪已分手，GiGi被誤會介入伊健與邵美琪之間的戀情，結果她被認定是橫刀奪愛的第三者，而伊健就是負心漢，他們的銀色事業幾乎毀於一旦。不過時間可以沖淡一切，在GiGi的努力下，終於贏回觀眾的心，只是伊健不像女友般幸運，事業停滯不前。
GiGi說：「其實每個藝人都有過渡期，我覺得伊健上年嘅發展都算唔錯。佢份人好睇得開，就算係事業低潮，我都冇擔心過佢，伊健唔係嗰啲會死撐嘅人，做人處事又比我成熟，反而我成日有問題解決唔到，要問佢意見。」
回想起與伊健相愛時，GiGi坦言沒想到會如斯複雜，如今雨過天青，更懂珍惜這段情，對於追求者，一律拒諸門外。近年GiGi經常與當紅俊男如金城武、劉德華和古天樂等合作拍愛情片，但她強調從未對他們動心。
GiGi解釋：「雖然我同伊健係因合作拍戲而擦出愛火花，但當自己心目中已認定一個人，基本上唔再容得下其他男人。」
GiGi跟金城武合作過電影《心動》和新片《向左走．向右走》，GiGi覺得他頗cool，她說：「平日我哋冇乜聯絡，因為佢大部份時間都喺日本。同佢拍《心動》時，覺得佢幾cool，最近再同佢拍《向左走．向右走》，先覺得佢放開咗。不過我見佢未埋位就攞住本《孫子兵法》睇，佢都幾鍾意睇書，又成日同我講做人哲理，好彩我鍾意睇書，同佢都傾到偈，不過我當佢係阿哥，唔會有其他感覺。」
至於常與拍檔傳緋聞的古天樂，雖然二人曾三度合作，但一樣未令GiGi動情。GiGi笑說：「古仔個人好少嘢講，平時開工除咗埋位，我同佢都坐到天各一方咁，可能我成個男仔頭，佢見到冇feel啦！」
至於劉德華，GiGi對他又愛又怕，她說：「記得我出道時，好幸運可以同劉德華咁紅嘅演員合作拍《烈火戰車》。開工時，我唔敢同佢講嘢，反而係華仔主動同我傾偈。事隔幾年，我再同佢拍《嚦咕嚦咕新年財》，我先敢主動同佢傾偈。
「華仔幾聰明，有內涵，又好勤力。雖然我好欣賞華仔，但我只當佢係前輩，亦冇私交，所以合作兩次都唔會過電。」
