楊受成嘅英皇集團旗下嘅英皇電影部，其經理人部門喺全盛期簽下嘅藝人包括黃秋生、孫佳君、張家輝、何超儀、黃佩霞、梁敏儀、朱燕珍同連凱，但舊年開始，英皇電影部旗下嘅藝人紛紛離巢之後，經理人部門喺一個月前亦正式暫停運作。
黃秋生同連凱早排已經轉投林建岳嘅寰亞娛樂，黃佩霞轉行教瑜伽，何超儀同梁敏儀就先後將電影部嘅經理人合約，轉到英皇唱片嘅經理人部門，至於朱燕珍就喺年幾前已經解約。
剩番嘅孫佳君同張家輝，佢哋同英皇簽嘅死約已滿，𠵱家雙方傾緊解約問題，但孫佳君已經自行洽談片約，喺呢個月中佢重會喺香港拍攝一部愛情片《某年某月某日》，同謝君豪拍檔演出，張家輝就傾緊過檔寰亞。
英皇電影部嘅負責人張承勷噚日喺電話度，就經理人部門解散嘅問題話：「個部門由二月一號起已經冇再運作，啱啱大部份演員都約滿，剩番孫佳君同張家輝重有生約，但大家傾緊解約㗎啦。至於經理人部門嘅同事就去埋唱片部幫手，搞經理人唔係我專長，所以我哋日後會集中搞製作。」
陳啟泰、陳煒、朱慧珊、萬綺雯、樓茜妮、黎思嘉、黃浩然等亞視演員，噚日喺沙田馬場出席「亞洲電視盃讓賽」，其中萬綺雯着住二千幾蚊嘅VivienneTam低胸連身短裙，豔壓群芳。
問萬綺雯點解突然咁性感？佢話：「𠵱家都已經轉天氣啦，唔通着冬天衫，咪熱到生熱痱！遲啲再熱啲就三點式，
台灣歌手周杰倫日前去咗溫哥華為演唱會作準備，對於有幸成為《時代》周刊亞洲版嘅封面人物，周杰倫話：「我很高興，可以在雜誌上談華人音樂，讓不懂中文的人都可以懂得華人音樂。」周杰倫還提到好希望將來可以當導演，拍攝一部以華人為題材嘅電影。
成龍噚日去到美麗華酒店出席「國際微笑行動」揭幕記者會，佢會為呢個活動任大使。對於喺英皇嘅春茗上，被指刻意同曾傳緋聞嘅鄭希怡（Yumiko）保持距離，大哥話唔想再講，因為佢唔想愈描愈黑，另外佢重強調有同Yumiko唱過卡拉OK，所以冇任何理由唔敢見對方。
台灣天后孫燕姿日前喺台灣為新唱片《未完成》舉行簽唱會，大受歌迷歡迎。孫燕姿近日事業同愛情都兩得意，歌迷重祝佢一定要幸福，孫燕姿一於照單全收。
孫燕姿出席完簽唱會後，隨即到咗台灣淡江大學演出，佢喺表演前重專登去食咗一碗魚丸湯，孫燕姿話：「我希望一陣到台上演出，不會唱到一半魚丸就從嘴巴滾出來。」
陳小春同張栢芝喺泰國曬完日光浴返嚟香港之後，唔知係咪覺得未夠皮，近幾晚都要同班老友夜夜笙歌。繼大前晚小春同王合喜唱K唱到凌晨四點幾之後，噚日凌晨佢又同朋友去楊其龍間dragoni消遣，記者問佢係咪同成班老友去玩？小春就話只得佢同另一名男性朋友。而今次小春又係搞到凌晨四點幾至走人，真係精力旺盛。
