你戥九龍城無咗呢樣，無咗個樣可惜？呢班來自各區，年齡各異的小朋友反而覺得九龍城樣樣都好，佢哋就係貪佢「唔就腳」、十室九空、靜靜哋別有特色；唔信？響訪問期間遇上嘅妹妹仔手袋黨、單車四男組，正要帶你用佢哋嘅方法去Enjoy九龍城。
四位小小美少女分別家住沙田及紅磡，但平均每星期都會跟家人到九龍城兩次。佢哋講起呢道就直豎拇指，大讚九龍城好玩又多嘢買，重深怕無人信，二話未說就一人「的」起一個手袋，四隻小手分別拖住記者兩隻大手，帶記者到十室九空的啟德大笪地心水攤檔，並自掏腰包「表演消費」；小小一個荷包可以令佢哋滿載而歸！
四個妹妹仔毫不猶豫走向心水檔口，好開心咁打開銀包，各自放低十蚊，玩射汽球；嘉敏竟然可以啪啪啪啪啪連續射中五發，「射中一分已經可以換禮物，但係我想換五百分嗰隻！」
地址：啟德大笪地A7檔
收費：每十發收$10
行過兩步，就係大家好恨玩但唔多識玩嘅風箏，嘉儀話：「最細嘅風箏係$4就有風箏連線轆，佢係好易飛得起，但係我哋覺得大隻或者鑽石型至靚，舖頭入面有好多！」
地址：啟德大笪地A18檔
玩咗一個晏晝，小美女終於肯返去全新開放釣蝦場搵父母，嘉儀同欣欣好識把握時間，立即攞魚竿去釣蝦。
啟德釣魚釣蝦場
地址：啟德大笪地
電話：27169088
收費：釣蝦一支竿每小時$48（星期一至五）$60（星期六、日及公眾假期）；煮蝦費$20。
家住彩虹的倪先生是釣蝦場忠心Fans，兩年來每周玩兩次，更謂：「呢度就腳，人又少，感覺好放鬆；我每一個鐘都釣到斤幾中蝦，次次嚟都可以加餸，太太都好贊成我玩！」
戶外活動
自從半年前買咗新單車，四個家住九龍城嘅細路對九龍城有重新評價，「正！平均一個星期會玩二至七次，每次兩個幾鐘，最好玩係上橋，重有掟彎……」，單車公園有草地瞓，有設施玩，有步行徑……，其實唔踩單車都可以好好玩。
新天地單車公司
地點：賈炳達道公園
電話：23820618
租單車收費：每小時$10至$13，兩小時送半小時。
營業時間：9:00am-8:00pm
寨城公園依清初江南園林設計，建有城牆，建有園中園……，但對家住東頭邨跳舞老師陳小姐嚟講，全部嘢都唔夠地上石卵吸引，令佢忘形赤腳教男朋友大跳社交舞，「赤腳舒服啲，而且呢度空氣好，有雀仔聲，人又少，可以好放鬆咁跳；唔似得出去被人眼望望，感覺好自在！」
室內好節目
當人人都懷念舊機場人山人海，當人人都恨九龍城有地鐵方便吃喝，響呢度打躉九年嘅輝哥火鍋老闆輝哥，竟大唱反調：「人流多未必代表會響你面前停低，反而交通唔方便，好多清水灣、畢架山嘅客都會專登揸車嚟。我都係應客人要求，至會喺火鍋店旁開兩層按摩店，等客人可以享受多一種服務。」
「雖然我裝修到成間泰國ResortFeel，用嘅都係中式穴位按摩手勢，所以幾得客人信賴，開咗三幾個月，估唔到反過嚟帶多咗生意畀火鍋店！」
輝哥靚足一世
地址：九龍城福佬村道80號地下
電話：23823699
營業時間：11:00am-4:00am