樂口福、公和荳品廠、貴嶼和記隆……，單聽舖名，已經好夠照，經典感覺返晒嚟！
老食店企硬九龍城幾十年，隨時「老」過你；佢哋明顯有一套老風範：好嘢自然多人食，明星商家食客老遠幫襯捧場係理所當然，所以佢哋話唔在乎阿邊個阿邊個嚟過幫襯，反而覺得攞明星簽名放響舖面「拉客」有損身價！
潮式酒家
在泰國舖壟斷九龍城之前，呢度最多潮州人聚居，所以各式潮式食店一應俱全。其中樂口福令人感覺係High嘢，早在$4一個飯盒時，已有大量明星商家迫入去食翅！當中有鳳凰翅、全雞翅等，最受歡迎是紅燒大包翅。
樂口福李先生說：「有明星幫襯有咩咁叻？點使貼明星相出嚟咁肉酸。成龍未成名時，七小福都係幫我哋樂聲潮劇團做潮戲！𠵱家杜（琪峰）同老婆每次每人都兩碗翅打孖上，重有肥姐、周潤發、鄭希怡、孖女阿Sa都會嚟，不如你隨便噏個名，睇睇邊個未嚟過！」
開業年期：在汕頭經營十多年後，搬入九龍城五十年。
大廚陳師傅強調舊時響西環做𡃁時送外賣畀李嘉誠，話李生響吉席街閣樓做廠仔都係叫炒粉麵。呢味將魚粉打成麵，再加蝦肉，冬笋絲等炒成，清新又飽肚，售$60。
講到受歡迎，首推即叫即上枱紅燒大包翅以六両鈎翅加火腿、老雞、瘦肉，燜六粒鐘而成，上枱時完完整整一梳梳，入口味濃，腍得柔滑。
樂口福（23821172）
地址：九龍城侯王道一至三號
營業時間：11:00am-11:00pm
健怡小吃
離遠已經聞到豆香，佢哋依然企硬用百年老法，用大大隻磨嚟磨豆，大大隻鑊煮豆漿，賣即磨即煮即撞豆花豆漿！呢度啲辣味腐乳都好出名。
九龍城總店大廚房近乎二十四小時開工，供應全線分店使用；做咗三十八年老夥計田叔話：「收得人七蚊一碗豆腐花，梗係要認真，除咗用料好，撞豆腐花時都要用反手做個脹卜卜賣相……。」
公和荳品廠（27180976）
地址：九龍城福佬村道67號
營業時間：8:30am-8:30pm
開業年期：1893年開業，搬入九龍城45年。
節慶禮餅
貴嶼和記隆楊先生話：「我自問係個理科人，由十五歲開始做潮式餅糖糕包，到𠵱家四十二歲，呢度二百幾種食物都識做！更將製法做咗詳細紀錄，再用高科技改良！」
跟楊先生參觀秘密工場，裏面由古老土炮爐、糖衣機，以至為日本排污系統製造廠生產機器都有。「呢啲高科技機器，真係可以令出品控制維持一個超新鮮水平，連衞生署為我哋做化驗都嚇一跳！」怕言過其實，便順手將枱上芋頭草餅吞下，果然入口清甜幼滑，好想順手食多件！
貴嶼和記隆（23821673）
地址：九龍城城南道59號地下
營業時間：8:00am-8:00pm
開業年期：54年前在尖沙嘴開業，30多年前搬到現址。
早晨美點
由於鳳香園對正城寨同東頭邨，以前不單止麵包日日清，連一袋袋餅碎、麵包皮、蛋糕皮、隔夜麵包都搶手。潘先生說：「𠵱家我哋係香港三大麵包批發之一，每日供應近千間冰室、食堂，因為呢間係風水舖，所以我哋咪繼續保留，而且重有好多老Fans支持！」
鳳香園（27160655）
地址：九龍城賈炳達道59號地下
營業時間：6:30am-9:00pm
開業年期：40年
潮式粉麵
呢度啲墨丸係人手鮮打，粒粒都有墨魚，湯水用魚湯煮成，零舍鮮味！名人好似阿Sam、黎明、蔡少芬、林家棟都鍾意食㗎！
黃明記（23832742）
地址：九龍城啟德道80號地下
營業時間：11:00am-2:30am
開業年期：30年前響東頭邨開檔，25年前搬入九龍城。
晚飯消夜
舊式粥麵店之所以能夠逆市開分店，全靠一隻隻煲仔飯、煲仔菜，「我哋原煲連餸菜一路煲一路煮一路加料，全部係心機，雖然㷫烚烚煮到身水身汗，但就可以絕對鮮味。」
添樂園（23822369）
地址：九龍城福佬村道4號
營業時間：7:00am-2:30am
開業年期：40年