有二十四年歷史嘅居屋計劃「壽終正寢」，除咗居屋業主同想買居屋嘅低下階層感觸萬千之外，相信房屋署副署長鄔滿海係最百般滋味在心頭嘅人，因為佢可以話係「居屋之父」，七七年加入房署就係為咗搞第一個居屋計劃，一手一腳湊大居屋，直到𠵱家停建、停售。
唔只居屋完成咗歷史任務，喺房署做咗二十五年嘅鄔Sir後日亦會由房署空降屋宇署做署長，結束服務公屋居民嘅生涯。八方噚日同佢餞行，鄔Sir話，最唔捨得嘅並唔係好似自己仔一樣嘅居屋，反而係房署班同事。
回想初出茅廬時，鄔Sir喺理工大學嘅前身──香港工業學院畢業，係行政會議召集人嘅梁振英嘅師兄，喺差估署做咗近十年，考埋個測量師牌，咁啱當年房署搞居屋計劃，聘請高級產業測量師，所以跳槽過去，佢話「當年後生仔唔想等，心急想升職。」結果同居屋結下不解之緣。
除咗居屋，鄔Sir重係房署商業樓宇科嘅先鋒，佢話十幾年前房署嘅商舖唔憂冇人租，後嚟多咗競爭，先要落手落腳搵生意，其中最經典嘅一役就係成功將吉之島百貨引入樂富商場，「當時啲同事親自去機場接啲日本人，好大陣仗㗎。」
（圖）成班傳媒朋友同鄔滿海（前排左三）餞行，鄔Sir當然笑逐顏開啦。
傳真︰2623-9278
電郵︰