嘉碧儀同石仔（陳宇琛）雖然到𠵱家都唔認拍拖，但其實呢個已經係全行都知嘅事實。之前重話石仔同Kawaii拍拖，但俾嘉碧儀橫刀奪愛㖭。
據馮仁昭收到嘅消息，原來當時石仔同Kawaii已經拍咗個幾月拖，後來嘉碧儀介入，演變成三角戀，最後石仔就揀咗後生啲又靚啲嘅嘉碧儀。
石仔雖然同Kawaii分咗手，但Kawaii仍然當石仔係朋友，重對佢好到不得了。Kawaii知道石仔事業心重，就利用自己做DJ嘅人脈，幫石仔約啲記者、唱片公司高層食飯，落晒嘴頭極力推薦，睇吓有冇唱片公司對石仔有興趣，又叫記者多啲訪問石仔。
明明分咗手，Kawaii重對石仔咁好，所以話女人一旦鍾意一個男人就會死心塌地，乜都肯制！
洪欣同陳錦鴻成七、八年冇合作過，最近終於合作拍電影《隻眼開隻眼閉》。洪欣噚日開工時，俾記者追問佢嘅戀情，佢就認自己有人追，重話男友係咪圈中人都唔緊要，洪欣話：「只要自己鍾意，對方係乜嘢人都冇所謂，就算係外國人都得，最重要係錫囝囝同我屋企人。」
最近有雜誌報道，話許愿近期經濟好唔掂，搞到欠佢旗下藝人陳豪唔少錢。不過，陳豪同馮仁昭講根本冇咁嘅事，佢亦同嗰本雜誌嘅記者否認咗，但唔知點解會變咗另一樣嘢。
而許愿就話：「我幾年前就唔掂，𠵱家改善咗，我覺得啲人想破壞我哋嘅感情。」
鄭中基噚日喺新城接受《聯Fan所》節目訪問，日前佢為拍新歌《我代你哭》MV，特登走去學手語，噚日佢示範咗幾個手勢，似模似樣。
鄭中基近日患咗鼻膜炎，所以把聲有變，佢話：「我𠵱家把聲似阿倫（譚詠麟），有啲鴨仔聲。」
賀歲片《行運超人》同《百年好合》早前鬥到難分難解，前排《行》就話《百》派贈券有篤數之嫌，𠵱家《行》重上緊畫，雖然只得五間戲院做，但前日票房都有成三十幾萬，網上又有人話《行》涉嫌篤數，其實咁多年嚟成日都有票房篤數嘅傳聞，但始終都好難有實質證據。
蕭若元同蘇絲黃噚日去咗荃灣有線電視大樓。蕭若元話將會同林小明合作拍新片《功夫足球》，卡士有張衞健、許志安同蘇永康㖭。
而蕭若元噚日又話政府冇幫過香港電影事業，佢話：「如果政府借出場地畀我哋拍攝都好好，電影公司可以慳番大筆。」
