本欄喺二月十七日講「的士減價」，談到機場常客call的士接機，慳番車錢。之後有幾位的士司機來電郵，與左丁山分享的士生意嘅情況，多數係唉聲嘆氣嘅。
其中一位署名「的士佬李×」（假名）嘅電郵，有啲新意思噃。的士李話call的士往機場攞折扣一事，係真嘅，因為佢亦「賴此為生」！一位小姐話隨時可以畀左丁山一兩個電話號碼以便往返機場之用。
的士李話如今搵食艱難，佢哋要諗辦法擴充客源，卒之有一條好橋，就係用e-mail與相熟嘅內地的士司機交換情報，互相推薦熟客。譬如內地人來港，的士李收到電郵，就會去機場接機。的士李嘅熟客上大陸，驚住不良司機打劫或遇上路霸，的士李就會用電郵通知老友接機、接船或者接車，於是創出「三贏局面」，兩邊的士佬，乘客盡皆滿意。
呢個方法又幾好喎，開拓咗內地的士佬網絡，原來有咁嘅好處，司機快啲去上網，學中文打字嘞，你話一個月接到三五個內地客，每個包幾日的士，掂晒。的士李又話：「由於賣漢堡包嘅、的士佬，已被高貴權威的局長定位為不懂事一族，我們也不存甚麼希望在她們了。」
最後，一位中學英文老師來電郵，話想用PerryLam（本欄二月二十二日）篇文章教學生，唔知去邊度攞到《傳媒透視》，好易啫，登入香港電台網站