靚女經紀噚日向小初推介，近期股價上落極大嘅信用卡防盜（1051），佢話高風險高回報，夠膽可以上車，但小初就自認細膽，真係唔敢掂。
信用卡防盜早幾日失驚無神勁升五成，但第二日股價則勁插，噚日又升番18.5%，收0.032元。隻股雖然大上大落，不過成交重係好細，只得幾十萬銀左右，真係唔縳好安全帶，都唔好立亂上車，容乜易上咗車落唔切。
靚女經紀覺得信用卡防盜有得博嘅理由好簡單，就係公司將會在下周公布，落實喺大陸同農業銀行發展信用卡安全支付服務，加上隻股有金牌炒家嘅祝福，冇理由炒唔起喎。
小初記得，隻股舊年年中，大股東透過金利豐證券，以每股0.01元，配售9.34億股舊股出街。隻股成交一直稀疏，要咗貨者應該未走得甩。人哋成本咁平，普通街外人如小初之流，又點會夠人玩？計過度過，都係睇人表演好過。
慕容小初