是日推介遊車河路線，遊西貢。
指定節目，先到大㘭門放風箏，再尋古迹，看鮮為人知的摩崖石刻，最後驅車直入布袋澳，划艇兼食當造海鮮，輕輕鬆鬆過一日，點睇？
記者：陳漢榮
攝影：黃子偉
模特兒：Suzuki、Nancy
得悉首站是大㘭門，Suzuki與Nancy異口同聲：「風箏與風？我哋咪Twins？」到清水灣郊野公園內小食站，二女為選購何類型放箏起爭執，Suzuki自詡高手：「信我！細鳶輕身易起鳶。」Nancy不服：「信你就死！揀大鳶，易食風呀。」攝影哥哥發怒：「你兩個咪嘈，我話事，揀大鳶，影相好睇啲。」
風箏場上，四方亭內，二女喘着氣。
Suzuki自唱自嘲：「當風箏遇上風……無風點玩呀。」Nancy抱怨：「又唔見其他人起唔到鳶？渣你就認啦。」發覺身旁的小兄弟在偷笑，Suzuki惱羞成怒：「𡃁仔，你起到鳶，隻風箏送畀你。」結論是風箏與面子兼失，為免尷尬，藉口一行樹木研習徑，火速逃離現場。
小食站
開放時間：星期一至五10:00am至5:30pm，星期六、日8:00am至8:00pm
風箏售價：$25至$40
行車路線：大㘭門路迴旋處直入清水灣郊野公園，有30個免費車位。
沿龍蝦灣路進發，看臨海摩崖石刻，Nancy幻想力豐富：「我估係外星人留低嘅記號。」Suzuki硬要鬥嘴：「係呀！你鑿嘅！你咪外星人囉！」查實此石刻於1980年由旅行人士發現，呈幾何形及鳥獸狀的紋飾久經侵蝕，甚模糊，一說這是天然侵蝕所致，一說這是遠古船民的出海紀錄，暫未有定論，現為法定古迹。
看罷石刻，二女拿出手排鬥快釣魚，好不容易有石狗公上釣，Nancy不忿：「咁細條，要唔要都罷。」Suzuki洋洋得意：「吃不到的葡萄是酸的，嚟龍蝦灣釣魚，真係釣龍蝦咩。」
行車路線：
沿龍蝦灣路進發，見一避車處，有指示牌指示石刻所在。
天后廟側的摩崖石刻更值遊覽，因它是香港最早的記年石刻：1274年，南宋，汴梁人嚴顯彰與三山人何天覺同遊南北佛堂門，刻石為記，是研究西貢天后廟歷史的第一手資料。看罷，Nancy忽發思古之幽情：「古人真係有情懷，咁大段文，你估要鑿幾耐呢？」Suzuki揶揄：「話明係古人，梗有情懷啦，好似你咁咩，淨係識寫『到此一遊』。」
行車路線：
大㘭門路入清水灣鄉村俱樂部，有指牌指示石刻所在，有14個免費車位。
走布袋澳漁村小巷，一瞥，見有小艇出租。Nancy怕水，裝作視而不見，好動的Suzuki卻嚷着要玩。不一會，人已在水中央，查實布袋澳三面環山，風平浪靜，翻艇機會是零，但出海易，靠岸難，船槳左扒右撥，還是團團轉。一上岸，二女買海味，講價，難得地槍口一致：「我哋咁索，計平啲啦！」「好平㗎嘞！」「平$5啦！」「……」又擾攘了半小時，老闆娘敵不過她們的「絕世煩音」，投降。
喊餓，布袋澳海鮮食肆林立，Suzuki選最盡頭的「海鮮島漁港」，原因是：「有碼頭伸出海中心，喺海中心食海鮮，咁先有Feel嘛。」除了有Feel與海鮮種類齊全外，這裏不收油料，只收0.5%服務費，也是賣點之一。
行車路線：
沿布袋澳路直入布袋澳村，有10個免費車位。
陳記小艇
收費：星期一至五1小時$30，星期六日$100全日
電話：93587730
蛋白花雕蟹
（上，約$10/両）
新菜式，雞油加花雕酒，連花蟹蛋白一起蒸，酒香撲鼻。
椒鹽瀨尿蝦王
（下，約$13/両）
稱得上瀨尿蝦王，每隻至少12両重，椒鹽煮，簡單惹味。
海膽燜伊麵
（上，例牌$98）
無花無假，當造本地新鮮海膽，每碟伊麵至少有4両海膽肉，用上8隻海膽。
游水墨魚刺身
（下，約$10/両）
來自南中國海的墨魚正值當造，一魚兩食，除刺身外，還可白灼或椒鹽墨魚頭。
食客之言
華仔：「揸車入布袋澳食海鮮，多數揀呢間，喺海中心食海鮮，氣氛好啲嘛！」
店名：海鮮島漁港（21785151）
地址：清水灣道布袋澳村6號地下
剛啱抵港嘅新版三菱Pajero，雖然造型與原有型號相近，但就改換上全新家族式鬼面罩、四輪新款合金軨，同埋新款泵把內藏霧燈等等，從而令賣相變得醒目有型得多；車內設備又見齊全，高級真皮座椅、原廠恒溫冷氣及多功能彩色顯示屏幕全部都有齊，可謂一應俱全。引擎配搭方面，其中頂級版一台3.5公升V6GDI偈，動力輸出充裕外，而且重有低耗油量嘅特性㖭！
Pajero3.5V6GDI小檔案
引擎：3496ccV6DOHC
馬力：220ps/5500rpm
扭力：35.5kgm/3750rpm
尺碼：4770×1895×1855mm
軸距：2780mm
車重：2100kg
新車售價：$398,000
車輛提供：環宇汽車（27211111）