港股牛牛皮皮欠新意，恒指收報9122，跌11點，成交唔夠51億元。期指結算後，中移動（941）及聯通（762）欠缺買盤支持，再度受壓，中移動跌2.33%，收報16.80元，聯通跌1.56%，收4.725元。大市主要由滙豐（005）及長和系支撐。
海爾中建（1169）繼前日升逾40%，噚日早上一度再升近15%，高位唔少沽盤湧現，最後收報0.20元，升幅收窄至2.56%，睇走勢似係大戶散貨格局。
Cookie話，唔少高位追貨嘅散戶都損手，不過今次班散戶已經好精，只玩即日鮮兼且唔溝貨，免得愈踩愈深。不過，海爾中建具注資概念，加上海爾集團取得控制權後，肯定會有一番作為，持有作中線投資應該唔錯。
首富國際（204）周三大跌70%，噚日又大升98%，收0.198元，不過成交就好奀，只得31.7萬元。市場傳出，大股東又出手增持。大股東去年8至9月期間頻頻入市增持，據悉當時買入價高達0.19－0.20元，其後增持行動告一段落後，股價亦再難向上寸進。黑客話，噚日股價反彈，全屬有心人嘅Mark價行動，而非有人積極增持，如果係有心增持，點會畀股價咁快就升近0.20元水平？
萬順昌（1001）同埋勤達（1172）將搞睇廠團，相信好快有捧場買盤入市支持，兩股噚日分別升1%及7.8%。早前萬順昌提出回購建議唔派息，擺明大股東對股價前景有信心。不過，ｅ莉莎話，回購建議獲超額票數接納，反映小股東覺得套現要緊，股份冇股民支持，單靠大股東睇好，好難有鑊氣。
阿 虎