德國喺世界盃有令人刮目相看嘅表現，但係估唔到佢哋嘅球隊，今季竟然係四大聯賽之中最快喺歐洲賽出晒局，睇嚟都拜「世盃後遺症」所賜。
拜仁慕尼黑早喺歐冠盃首圈分組賽下馬，都可謂今季最令人意外嘅事情，同時間上季歐冠盃亞軍利華古遜，今季表現走樣到不堪入目，啱啱亦喺歐冠盃次圈以四戰全負劣績出局；剩番嘅多蒙特，最慘係上一場完場前被皇馬嘅樸迪路一腳扳平，𠵱家形勢極不利，睇嚟都會喺呢個階段玩完。
足協盃方面，僅存嘅柏林哈化及史特加，都喺前晚踢埋第四圈次回合後宣布玩完。我求大俠就覺得，可能同佢哋班球員喺世界盃搏得太盡有關；姑勿論如何，歐洲賽咁快就少咗德國球隊競逐，多少都係球迷嘅損失。
英超聯賽會就快公布今季足球先生得主，博彩公司將阿仙奴前鋒亨利列為得獎大熱，賠率得嗰倍半左右。我求大俠就覺得今季競爭好激烈，有好多個有資格同亨利拗手瓜；如果由我揀就一定貼紐卡素舒利亞：老舒今季已入咗二十一球，而且佢得獎賠率有成十五倍，博佢能帶領紐記入歐冠盃八強，有咁嘅豐功偉績，奪獎都幾和味！
韋斯咸後衞列加日前勸隊友迪肯尼奧成熟啲，唔好成日同領隊羅達拗頸，同埋唔好成日話想走又唔走。唔知佢呢番話係咪出於好意，但聽落好似有啲酸味；列加響球場上紀律咁差，隨時無得撈，會唔會係眼見迪肯尼奧大把選擇而唔抵得？吃不到的葡萄，實係酸㗎嘞。
皇馬響周中客鬥完多蒙特之後，禮拜六即刻要響西甲客鬥艾拉維斯，佢哋兩個後備蘇拉利同米拿比斯就唔生性，早兩日練波時有拗撬，幾乎講手，好彩隊友及時制止。呢件事未必影響到隊波士氣，反而會方肯定記咗佢哋一個大過，隊波咁多兵，佢兩個因住……
前日克拉科夫對拉素因為球場結霜改到下周中踢，克隊會長對於呢個決定好反感，佢好激氣咁話：「呢場波根本就踢得，歐洲足協唔應該就晒意大利同埋西班牙球隊。」我求大俠覺得其實拉素都唔想改期，因為佢哋下個禮拜六要火併同市宿敵羅馬。
自從波神佐敦講明喺剩番嘅球季要用盡自己所有「子彈」之後，巫師就好似上晒力咁，睇下波神今場對住火箭跛下跛下咁都射入三十五分就知喇。雖然場波就無開盤，但下半季執住巫師同魔術呢啲排七八，爭入季後賽嘅鬥志鮮明球隊真係有so㗎！