煲呔曾蔭權日前公布嘅人口政策報告，入面提到男性壽命短過女性，令衞生服務界嘅立法會議員麥國風好困擾，重一而再問煲呔，政府有冇政策搞搞佢。
米高麥禮拜三已經想向煲呔問呢個問題，但係立法會主席范徐麗泰唔畀佢問，結果米高麥等到噚日內會再嚟過，議事廳內個個笑到捧住個肚，惟獨是煲呔不知幾咁尊重議員，好嚴肅咁答話男女壽命有差距係自然現象，無論美國、肯雅都係咁，香港男人唔係特別差。
呢一刻，坐喺煲呔身邊嘅官員都笑到趴喺枱面，但係米高麥重繼續追問，佢覺得政府應該有策略性嘅工作，好似保險咁令男人長命啲。煲呔繼續玩認真，佢叫議員千祈唔好叫政府做乜嘢，事關如果男人早啲退休，養尊處優，可能爆血管機會重高！總之聽煲呔話啦：「天然嘅差距，作為凡人都係唔好去滋擾囉！」
傳真︰2623-9278
電郵︰