七年前《櫻大戰》在Saturn推出時，的確轟動一時，憑住戀愛、戰鬥加大量精采動畫等必Hit元素，迅速吸納一大班忠實Fans，當時得個恨字嘅PS友，勢估唔到今日居然可以喺PS2上玩到《櫻大戰》。首度踏足PS2，並非推出續篇《櫻大戰5》，而係將第一集重新製作，幾乎肯定成個系列會由頭出多次，擴大Fans層外，重保證定時有一大筆收入，呢條數認真襟計。
記者、攝影：徐影龍
經歷七年，玩家要求已經高咗好多，既然屬PS2初試啼聲之作，梗要將最好嘅技術擺晒落去，齋移植SS版點講都唔通。Remake版《櫻大戰～熾熱血潮》除保留原有人設及劇情外，大部份畫面均重新繪製，兼且有幾段動畫亦屬重新製作（包括OP及ED），貼近機迷要求之餘亦可令忠心Fans有新體驗，世嘉做Game嘅誠意不容置疑。
由於一般劇情畫面以卡通手法交代，故此新舊畫面質素分別唔大，但一到戰鬥部份，機體及場景以全3D表達，比當年2D斜視式靈活百倍，除可自由轉換視點外，大量必殺技紛紛展現其應有氣勢，加上今集着重戰略部署及敵人AI已調高，令戰況更為剌激精采。
動畫可算《櫻大戰》系列入面不可缺少一環，而《熾熱血潮》就加入極受製作人及機迷讚賞嘅CG加卡通技術，呢種將傳統卡通結合CG嘅技術，自《櫻大戰3及4》已開始登場，優點係各種物件有CG嘅真實感及靈活動作，同時又兼具卡通嘅畫風，如新嘅翔鯨丸及光武出擊片段，就已經令人對《熾熱血潮》另眼相看。
核心劇情冇變，不過就新加大量事件，如第一話中會有堇嘅歌迷要求代傳信件，又或喺閣樓跟藤枝小姐晒月光等，而且好多舊有事件都用另一手法表達，不過要數最受Fans歡迎嘅，就係新加專講紅蘭嘅第六話，內容大約解釋紅蘭迷戀機械以致走火入魔嘅來龍去脈，當然唔少得新加動畫及事件，整體嚟講令人感覺呢隻《熾熱血潮》絕非搬字過紙咁求其。
系統方面集四代之大成，其LIPS選答系統種類多到不得了，較為特別有新加嘅ActionLIPS（看圖按指令）及EventCatch（偶遇捕捉），令到唔同對答出現更多變化，而且影響今集新加嘅「隊長度」數值。呢個數值隨住所選答案而將大神性格分類，到戰鬥時便會以風、林、火、山等屬性出擊，甚至連個「朵」都唔同，如烈火隊長、深林隊長等，可謂將第二集之軟、硬性格系統大幅進化。過往多款迷你遊戲已轉往「帝劇漫長的一日」嘅「花組百貨店」，不過要下載至日本i-Mode手機先有得玩，香港玩家無緣相見，遊戲中取而代之嘅MiniGame係《花札》，玩法類似啤牌遊戲釣魚，唔同組合有唔同分數，熟習後就可在爆機後玩「花札大戰」。戰鬥部份除之前已有嘅合體技、協力攻擊外，今集首次加入5Hit特殊連技及友情Counter系統，只要鄰近之駕駛者好感度夠高，就會出現代為擋格嘅情形，好處係光武唔會有任何損傷。
由於《熾熱血潮》普通版及特別版同時有行貨，令到令次特別版破例炒唔起。特別版除Game外，重包含一個陀表、花組相架及PremiumDVD。陀表由全金屬製做，頗精美，相架就較為普通，而隻PremiumDVD其實普通版都有送，不過要注意水貨區碼為二區，行貨區碼為三區。順帶一提，嚟緊PS2嘅中文Game潮真正殺到，除五月有中文版《熾熱血潮》外，重有《TOD2》、《阿格斯戰士》等。
由96年推出至今，《櫻大戰》系列跨平台推出唔少版本，包括Saturn、Dreamcast、GameBoy、PS2、PC等，每次都會同時推出包含各種精品嘅特別版，賣價當然唔平，對Fans嚟講可算又愛又恨。筆者亦屬《櫻大戰》死士一名，追捧相關產品多年，每次到日本採訪GameShow時，例必到太正浪漫堂大出血一番，今日就同大家介紹一下幾款較特別嘅版本。
遊戲類型：SLG
對應機種：PS2
遊玩人數：1人
開發商：SEGA?RED
(C)OVERWORKS/SEGA
(C)RED
售賣點：
DreamStore
灣仔東方188商場256號舖（25753285）
深水埗黃金商場地面13A2（23619699）