星期二本欄講大編輯喺怡東酒店威過警察，估唔到惹起鄭大班注意，當日十點幾喺節目度鋤咗有關人等十幾分鐘，大編輯中午瞓醒後登入互聯網聽番，聽到眉飛色舞，十分過癮。保安員雖有職責保護、維護室內秩序，以免人客受驚恐，但任何時候，保安員都唔應該大過法律上指定嘅執法人員，應與警察充份合作，否則嘅話，凡有錢人、有錢公司都養一隊「私家警察」，割地稱雄，所有遊戲規則都要改過晒咯。
大編輯提醒左丁山，最近佢頻頻聽到男人唔見荷包嘅傳聞，通常都係荷包放在西裝內袋，喺酒店、酒家內唔見嘅，話可能有專業扒手組織非常活躍，各位讀者務請小心。
扒手橫行，或者係經濟不景嘅象徵，中學讀歷史，課本上經常有一句：「×朝末年，皇帝昏庸，官吏貪污腐敗，民不聊生，盜賊四起……」現在香港特區情況重係唔錯，未致於此，但小偷多咗，大家都feel到，中環一家寫字樓管理處貼出通告，請租戶小心保管手提?筆記簿電腦，以免失竊，就係小偷現象啦。
維持治安唔係曾蔭培一個人嘅事，史稱貞觀之治，家家夜不閉戶，可見經濟繁榮之時，盜賊都會失蹤。故此梁錦松司長對特區治安亦有責任㗎，佢有辦法之時，曾一哥就唔使疲於奔命。梁司長有冇辦法呢？下星期三就知，但係兩張報紙已經頻頻爆料，消息來源似乎甚為權威，根據呢啲料嚟睇，經濟唔會好得去邊，李明逵接班後，話唔定慘過做李逵。