富咸禮拜三輸埋畀甲組般尼之後，宣布今屆四大皆空，但係呢件事真係嚟得好突然，因為富咸明知十一日內要踢四場波，最後點都會留力鬥般尼啩？結果似乎係領隊泰簡拿有心玩嘢，最後同球會玩同歸於盡。
奇就奇在禮拜一嗰場對熱刺嘅聯賽，點解泰簡拿會以強陣作賽，一啲力都唔留，唔通呢場打吡戰緊要得過足總盃？
結果兩日之後富咸俾般尼數三蛋？大佬呀！足球員都會攰㗎。其實泰簡拿同老細阿法耶茲唔啱牙已經係公開嘅秘密，我求大俠認為佢可能把心一橫，同阿法耶茲一拍兩散。般尼嘅捧場客就因為泰簡拿嘅可能動機而笑逐顏開，但就真係替熱刺嘅擁躉唔抵；不過，如果當日艾辛莫域爭氣，嗰球門前幾碼射入，上盤客就唔會……
艾芬保今屆不單止冇乜符弗令禾夫斯堡有威水演出，禮拜三重因為同交通警有衝突，可能搞到一身蟻：話說交警告佢超速，佢好唔合作兼冇禮貌，離開前重好大聲咁用污言穢語鬧人哋，結果俾人票控佢侮辱公職人員。佢雖然死口唔認，但我求大俠就唔幫佢，好簡單，各位都記得佢一直以嚟好多麻煩事，佢啲咁嘅底臭到冤，叫人點信佢？
英足總每年到呢段時間都會對一啲累積攞咗四面黃牌，即係再攞多一黃就停賽嘅球員額外開恩，尾二球隊西布朗就因為咁受惠，足總話佢哋隊中已累積四面黃牌嘅麥恩尼斯、基文迪同迪基奧，就算呢周比賽再攞黃，都唔使停賽。但我求大俠對西布朗都唔太樂觀，因為上年九月尾到𠵱家佢哋只贏過兩場，就算享受到咁嘅優惠，最後都好可能要降班。
去屆三料亞軍利華古遜一度令我求大俠十分欣賞，點知波勒同薛羅拔圖走咗之後，𠵱家變咗另一隊波：前晚紐維利喺歐冠射失十二碼，但諗番轉頭，紐維利不嬲好少操刀極刑，點解唔係門將畢特射嘅？唔通連呢個好有性格嘅門將都冇埋信心，似嘞！佢今屆真係俾人射到慌失失，連佢都冇埋信心，利華古遜真係護到級都偷笑。
巴西前鋒羅馬里奧話入夠一千球至肯收山，但係佢已經成三十七歲，重爭一百三十九球先至可以達標，咁點算呢？結果𠵱家效力富明尼斯嘅佢就已經諗咗條橋，就係走去沙地阿拉伯踢職業賽。我求大俠相信沙地足球水準應該唔及巴西同歐洲，羅馬里奧去到嗰度予取予攜，咁咪可以如願以償囉，真係人老精嘞！