見美股隔晚咁嘅款，幾乎全人類都預咗港股昨日冇運行，但個市往往唔係咁易俾人估中，李超人系公司發威（或作發火），帶番起個市，恒指由跌86點變升17點。
電訊股都重係軟軟哋，聯通（762）同電盈（008）各跌1格，中移動（941）跌兩格。電訊股已經跌到超賣，係時候有技術性反彈，不過買Call輪玩吓，聯通同電盈輪價外得太犀利，溢價太高，好難落手。中移動Call輪最多，交投亦暢順，數據亦合理，對象有9594同9607。9594現價7.8仙，溢價8%，槓桿率22.1倍。9607現價10仙，溢價10.5%，槓桿率17.2倍。兩隻輪都係5月夠鐘，9594比較搏殺格。
朝早跌市中，華創（291）最低之時都只係微軟1格，有護盤隊伍出巡，埋單收7元，升10仙。華創Call輪得隻9270，9月到期，現價8.7仙，溢價4.7%，槓桿率8倍，可以諗吓。
九倉（004）好番15仙，話之你有線寬頻（1097）又試新低。九倉跌親有基金買盤入市，好易彈番，當然要大彈就機會好細。
九倉Call輪9476最啱炒上落，正股跌買隻輪，執些少散水。隻輪6月夠鐘，現價0.195元，負溢價0.1%，槓桿率8.1倍。
章盛