小初噚日睇番經紀陳在羊年首個交易日推介嘅權智（601），真係大歎走寶，當時小初賺咗幾個位就走人，諗唔到隻股升完可以再升，有時買股票真係要揸長少少。經紀陳重話，升勢還可持續。
經紀陳推介之時，其實權智股價已經升咗唔少，當時股價在0.255元水平，但真係諗唔到，近期最高可以去到0.345元，噚日股價仍企在0.335元收市，成交512萬元。
經紀陳噚日吐出真心話，雖然權智係實力工業股，業績值得憧憬，加上PDA業務搞得唔錯，有分拆概念，但大海航行都要靠個好舵手，今次隻股有個年輕炒家幫手，搞得個場好熱鬧，還望佢繼續努力，引多啲芬佬落場，到時就真係有機會修成正果。
不過，就算係正經嘅工業股，有時都有突如其來嘅怪事發生，好似彩星集團（635）無厘頭在幾日內，由唔夠0.40元炒上0.85元，噚日竟然玩大插水，急跌32%，收0.49元，可算係近期最玩嘢之作。
慕容小初