近排新盤市場可謂「豪宅鬥一番」，示範單位嘅包裝已到達令參觀者流連忘返嘅地步。相比近期啲分層式豪宅，恒基九龍塘對衡道9號獨立屋，氣派最豪。其中兩間屋嘅實用面積，重大到成六千五百幾呎，有前後花園，又有泳池兼天台。
最高興嘅自然係室內設計師，難得香港地有咁大間屋可以發揮吓設計創意。發展商特地邀請日籍著名設計師森田恭通（YasumichiMorita）負責室內設計。
全屋運用大量皮革做材料，一枱一櫈一櫃大部份係皮做，果然夠「皮」氣。加上皮色同名牌Hermes好似，成間Hermes屋咁，整體強調簡單又不失華貴高雅感覺。
呢位大師喺香港設計過唔少店舖，例如銅鑼灣嘅和民食肆。
政府部門使錢向來都好豪爽，好似近期房協購入多部Panasonic42吋等離子電視（圖），安裝喺將軍澳怡心園每座嘅大堂，估計總值近二十萬元。房協物業發展測量師柯靄邦話，部Plasma主要播放屋苑資訊、新聞、天氣等。其實房協早前發售兩個屋苑，西環加惠臺同埋馬鞍山曉峯灣畔都有咁嘅設備，但只限在屋苑總大堂，怡心園就每座都有，睇嚟今次房協又想「一Q清袋」開紅盤。
樓市不振，顧客自不然聲都大啲，要求又多多，代理做生意都可謂「單單皆辛苦」。好似香港置業最近幫一間跨國公司搵租盤，以萬三蚊全包承租藍田滙景花園2座高層F室。業主已提供家具電器等基本設施，但係個客重話想要服務式住宅嘅服務。即係點？原來佢好忙，畀港置大約七千蚊嘅預算，幫佢買齊所有家居必需品，好似碗筷、飯煲、熨斗同床上用品等十幾樣嘢。港置當然一於服務至上，以客為尊，為兩餐乜都肯制。
樓盤優惠層出不窮，由怡華益新發展的粉嶺萬豪居，昨日公布推出相當實用嘅優惠。美聯羅英傑說，剛加入兩年菲傭合約，價值約7萬至8萬元，若不選擇該優惠，可獲樓價優惠。𠵱家發展商唔單只要照顧樓價及付款辦法等細節，連售後服務都要做足，之前送裝修，今次連菲傭都包埋，不過，唔知菲傭有冇得揀呢？
97年前被視為福地嘅香港禮賓府，已根據條例定為古迹，現以成為舉行重要官式活動場所，唔講唔知，原來擁有禮賓府全景嘅單位，叫租力特強。
以中環皇后大道中九號為例，啱啱租出三十一樓零一室，呎租十八蚊，高過市場造緊嘅十五、六蚊成幾兩成，就係因為望禮賓府。中原商業部營業董事何業榮話，個單位二千一百五十呎，租客係外資顧問公司，有一個月免租期。
佢又話，皇九一般單位面積大約三千至五千呎，兩千呎單位盤源有限，加上單位面向電梯，裝修簇新，臨窗望禮賓府全景，所以好快有承接。
蘭西
電郵地址：
