美股周三又再大跌，但噚日港股在期指結算效應支持下，先跌後回升，收報9134，升17點，成交55.45億元。3月期指收報9040，低水94點，未平倉合約逾5萬張，後市係龍係鳳好快有分曉。中移動（941）近期利淡消息多，噚日曾經跌至16.85元，創2000年以來低位，好友好辛苦至將股價托回17.20元收市。
粵海啤酒（124）及粵海制革（1058）一如所料復牌後有沽壓，粵海制革跌15.35%，收報0.237元，成交33.8萬元；粵啤跌9.89%，收報0.82元，成交1478萬元。
粵投（270）以14.51億元出售粵啤及粵海制革股權同埋其他資產，但最抵死係，通告冇披露出售粵啤及粵海制革嘅每股作價。雖則話買家廣東控股毋須提出全購，但都應該計條數出嚟畀大家參考，唔通真係懶成咁？粵投亦無提及會否獲注入東江水，但股價仍企穩，收報1.18元，微跌0.84%，成交3917萬元。ｉ師傅話，聽講有人正在收集。
彩星集團（635）近期由0.40元急升，高見0.85元。噚日據講有大戶出貨，股價急挫32%，收報0.49元，成交股數高達5482萬股，成交金額3192萬元。彩星已發行股數12.5億股，噚日成交股數佔已發行股數約4.38%。彩星股價噚日由0.73元跌至低位0.485元，係相當有秩序下跌，並唔似有人被斬倉。
黑客話，據講有炒家去年在0.20－0.30元水平收集咗一段頗長間，噚日才正式出貨，以彩星平均每股成交價0.582元計，今次炒家真係賺到笑。
阿虎