組合軟硬天師嘅林海峰（Jan）同葛民輝分開獨立發展多年，之前傳過佢哋兩個不和。事隔七年，佢哋又坐埋一齊接受雜誌《JET》嘅訪問，而影相地點就係佢哋初相識嘅明愛白英奇專業學校。
阿Jan話讀書時諗住識女仔，但結果女就撞唔到，反而識咗條仔，就係葛民輝，嗰陣時阿葛嘅花名叫做阿鼻，後來兩個人行埋一齊，就成為人稱嘅「軟硬天師」。
至於今時今日見到佢哋會有乜嘢稱呼，阿Jan話叫乜都好，不過其他人喺後邊都會加「不和」兩個字。
葛民輝就話自己從來冇研究過軟硬天師係咪拆夥，但佢話好明白乜嘢叫做「一日做雞，一世都係雞」呢個道理，所以一日係軟硬，一世都係軟硬，所以到今時今日，佢嘅簽名仍然係「軟天師」呢三個字。
安雅噚日喺台灣做宣傳時，佢模仿澳洲女歌手KylieMinogue喺MV入面嘅衣着。見安雅頭披長紗，裙褲重開衩露咗對玉腿出嚟，好鬼性感。
安雅話咁樣着除咗可以展示美腿同靚屁股外，又唔怕走光，安雅用普通話講：「我的三圍數字是32C、24同34，不比KylieMinogue差。」
蕭正楠同陳驊日前去上海接受電視台訪問，估唔到蕭正楠唱國語歌時都算字正腔圓，但同人講嘢就搞出唔少笑話。
蕭正楠接受訪問時，話自己鍾意「打街霸」電子遊戲，殊不知佢將「打街霸」讀成不雅詞語「打雞巴」，之後蕭正楠知道真正意思時，表現得好尷尬。
據韓國報章報道，朴志胤首新歌《你能嗎？》嘅旋律，被指抄襲美國組合Destiny'sChild成員BeyonceKnowles上年嘅歌曲《WorkItOut》，加上朴志胤宣傳時，又以爆炸頭形象示人，同Beyonce上年嘅形象差唔多。不過朴志胤喺網頁回應話Beyonce係佢偶像，歌曲似都唔出奇。
殿堂級搖滾組合Santana將於四月十一日喺紅磡香港體育館舉行一場演場會，據悉啲飛第一日已經賣咗八成。Santana之後亦會喺其他亞洲地方巡迴演出，其中一站已落實係新加坡。