新界政壇元老張人龍兒子張德熙，舊年接父親棒做新界總商會會長，噚日第一次主持商會嘅新春酒會。老竇在旁昅實，張德熙上到台猛咁話好緊張，其實表現相當淡定，更即席加插一段評論，話支持加1%至2%利得稅，但政府搞掂財赤後要將多收嘅稅回饋商界。
張人龍咁緊張兒子表現，鄉議局主席劉皇發看在眼內，難免有啲感觸。發叔先係向八方大讚張德熙虎父無犬子，之後慨歎新界第二代對政治好冷淡，重話自己個仔一啲興趣都冇，激勵極都冇用。
講講吓，八方忽然發現發叔隨身袋住本紅色小書，驟眼極似「紅寶書」毛語錄，睇真啲先知，係東亞銀行免費送嘅○三年記事簿，發叔話貪佢紅得嚟好意頭；其實呢班新界第一代元老後繼無人，豈止政事，重有慳家。
（圖）（右起）行會成員鄭耀堂、中聯辦副主任陳鳳英同署理民政事務總署署長王榮珍談笑風生，身為後輩嘅張德熙只好恭敬傾聽。
傳真︰2623-9278
電郵︰