二人男子組合Shine成員徐天佑及黃又南前日於西九龍中心拍攝宣傳片《人人愛上電影節》，對於外界經常將Shine與新晉男子組合Boy'Z比較，天佑說：「佢哋跳舞我哋玩樂器，路線都唔同。」不過Shine亦表示他們會練大隻，好讓跳舞時更好看。
二人男子組合Shine成員徐天佑和黃又南，前日早上為港台電視節目《人人愛上電影節》於西九龍中心進行外景拍攝，兩人更獲委任為今屆香港國際電影節大使。劇中兩人輪流飾演導演，更會穿梭幾個年代，雖然兩人略見疲態，但正式拍攝時則顯得十分專業。
由於現場有旋轉木馬，在未埋位時兩人均調皮地騎上旋轉木馬鬼馬一番。又南說：「我噚晚錄音錄到好夜，之後返到屋企瞓唔着，今朝一早就要拍嘢。我哋最近都係忙緊錄音，因為新碟會喺下月尾推出。」對於英皇男子組合Boy'Z被人起底，及經常將他們與Shine比較，天佑說：「我哋都好清貧，唔想去比較，有錢冇錢都要努力去做，先會有成績出嚟！我哋都要畀錢屋企，不過我哋屋企人冇畀好大壓力我哋。」又南則說：「我以前都係住屋邨，都唔係好有錢。」
問到兩人會否唱快歌及學跳舞以吸納不同的歌迷時，天佑說：「我哋之前都有學跳舞，不過始終都係慢慢嚟，我哋主要係玩樂器為主，同Boy'Z嘅跳舞路線唔同，等我練大隻啲先，跳起嚟都好睇啲！」
採訪、攝影：王崇穎
