韓風喺香港都吹咗兩三年，但其實我羅拉同唔少港人一樣，唔係太接受到嗰種誇張拍法。最近韓國啱啱上映完一套叫《BizarreLoveTriangle》嘅戲，個包裝好似柴嘩嘩嘅糖果喜劇，但因為有《貓咪少女》女主角孔曉珍做，就即管睇吓啦。原來套片鬼咁激，講及主角雙性同性愛不分嘅糜爛生活時，荒謬得令人心噏。
孔曉珍喺套戲嘅性格同佢喺《貓》片嘅角色差唔多，同樣自卑好靜，但喺一次沖涼時發現自己鍾意咗趙銀芝飾演嘅冇腦女同學，為咗佢打人偷錢，重坐過兩次監，但出返嚟趙銀芝竟然為錢嫁咗畀個崔光日飾演嘅男人。咁重不特止，趙銀芝離婚時為咗分老公一半身家，竟然叫孔曉珍同佢老公瞓！結果孔曉珍肚都大埋，三個人一齊生活，最後因為世俗不容，要去到外星行三人婚禮！
聽落去荒唐到極，而且戲入面女主角又露點，又成日揸住性用品四圍揚，唔怪之得係三級，本應都有另類戲迷捧吓場，可惜個導演鬼咁貪心，又加太空戲想拍到五光十色拍到唔湯唔水。結果眼高手低。