讀番書而又深信風水命理者原來大有人在。除咗大律師公會主席陳景生，重有一個立法會秘書長馮載祥，噚日佢大講風水，解釋做咗二十年「行運超人」嘅底蘊。
八三年馮載祥第一次睇風水時遇人不淑，佢照吩咐移動啲家具，點知兩日後竟肝炎入院。難得馮載祥冇對風水失信心，再搵青松觀高人侯天師指點，獲贈李白將進酒字畫化解病符。
八五年馮載祥調到中環聖約翰大廈嘅運輸署，又頭頭碰着黑，所養嘅馬臨衝線前暴斃，弟弟跟住亦過埋身。侯天師再次打救佢，話雖然辦公室有海景，但唔使恨，因為對正花園道條大斜路，煞氣大，好在前面有美利道天橋卸一卸，否則連馮載祥都有事。馮公子聞言嚇到搵定吉時，捉埋當時只有八歲嘅女一齊返辦公室，一二個三將書架搬去擋住無敵海景，自此就一路逢凶化吉。
傳真︰2623-9278
電郵︰