還沒去過海南島，因為愛吃海南雞飯的關係，心理上跟它親近了幾分。聽金葉海南餐廳的老闆陳生說，採訪前一晚剛剛從海南島帶來了海南三寶（東山羊、嘉積鴨和文昌雞），還有一些海南小吃，但原來除了食，發覺原籍海南的陳生猶如一部活生生的飲食字典，聽他說故事很有趣。
記者：邵超
攝影：陳智良
金葉海南餐廳才開張半年，乍聽以為是新餐廳，其實老闆陳生並非生手，父親早在香港開設餐廳，年輕時正值海南省剛改革開放，便回鄉投資，高峯期在海南島擁有三間餐廳和一間酒樓，逾二百位員工，父子兩人在海南人群中薄有名氣。
陳生的父親和兄弟早年跑到香港去經營餐廳，留下陳生與嫲嫲在鄉下。陳生憶兒時，吃雞是一件大事。
農閒時分，幾戶人家便夾份煮一隻雞，搵一個人做「公道」（公道即是將雞肉和飯糰平均分畀有份夾錢的家庭的負責人，佢重有權攞埋雞頸以上部份及雞毛），因為陳生有父親在香港賺錢回鄉，生活條件較佳，鄉里差不多每次做公道也找他們，想唔對海南雞飯情有獨鍾都幾難。
「唔好以為雞毛無用，鄉下有兩句歌闕，『舊銅舊鐵換薑糖，雞毛鵝毛換火柴』，做公道嘅人賣雞毛可以幫補燈油火蠟。」
陳生的爸爸雖非富家子弟，但總算白手興家，更會捐錢回鄉搞建設，贏得政協委員的名銜，逝世時更有政要到場弔慰。陳生人到中年，仍有少年人「不想靠父蔭」的傲氣，十六歲來港到父親與舅父經營的餐廳儲經驗，沒過幾年便於八三年趁海南開放改革大氣候下回鄉投資。
當年國務院港澳辦寫信給陳生，鼓勵他們北上創業，陳生是第一個將香港餐廳經營模式帶返海南嘅人，海南第一間有冷氣嘅餐廳亦是他開創的，材料亦是由香港運去，全部用香港廚師。陳生話自己有份拉開海南改革序幕，真係好光榮，諗番轉頭，也有點時勢造英雄的感慨。
「最開心係有一次企喺餐廳門口，有一個新加坡人揸住旅遊手冊問寶島餐廳嘅方向，係佢阿媽叫佢返嚟我間餐廳食，話可以食番舊時海南菜嘅味道。」
94年下半年，多個地方跟海南一樣搞開放改革，海南經濟活動明顯靜咗，陳生於九九年尾結束四間食肆，返香港在西環重新嚟過。
講起食番舊時海南菜味道，陳生話農村風味會重啲，例如原本海南雞係走地雞，雖然黃澄澄的肥雞皮爽肉滑，但香港人唔慣食，𠵱家嘅海南雞飯其實偏向新加坡多啲，唔用正宗海南雞，但陳生堅持三大原則──雞要有雞味，湯要清，飯唔膩。沒有禽流感驚魂時，單是午市便賣掉百多份海南雞飯。
「香港人對雞好有感情，我有一半生意額係賣海南雞飯得嚟。即使近排非常時期，下晝都可以賣到七十幾份。」
金葉開業差不多半年，又係時候換餐牌，好似嘉積鴨就會接東山羊推出，加埋海南雞飯，就成為鎮店三寶，好多生熟客亦慕名而來，始終海南人煮番家鄉菜較正宗吧！
海南三寶
東山羊喜歡食石罅間的嫩葉，又鍾意喺山上跳嚟跳去，肉無羶味肉又嫩啲，可惜商業化後供不應求，陳生用古法炮製黑草羊代替，配埋濃味清湯，一樣唔羶好味。
嘉積鴨俗稱番鴨，飼養過程其實好唔人道，放籠飼育，用飯糰和米糠餵飼糟肥，唔准接觸陽光，特別肥美，尤其是皮肉之間一層薄脂肪，食落口有少少刺激喉嚨嘅感覺，配埋酸辣雞醬就好完美。
陳生雖然賣嘅海南雞飯較似新加坡風味，但係堅持要沿用正宗海南風味，一定要加骨，有時碗清湯重加有珍肝，一種健美人士最忌，但最有傳統特色嘅配料，都算用心良苦。
是紅豆冰以外的另一推介，名字一靚一醜的竹芋丸和雞屎藤是海南特色糖水，很少在香港餐廳見到，咬落口煙韌有勁，原來重好滋補㗎！
採訪期間找到一班真真正正支持「金葉」嘅超級Fans，佢哋都係自西環舊舖開始幫襯，就算𠵱家搬咗去上環新舖，仍形影不離，部份更係食咗三十幾年，原來Fans一樣喜愛這裏正宗的海南菜，但各有各喜好：
金葉海南餐廳
地址：上環干諾道中130至131號地下
電話：21210506
營業時間：8:00am-12:00am