八方之前事先張揚，立法會秘書處每年一次請傳媒春茗，今年會成為「最後的午餐」，原因唔使講，都知係財赤嘞啩。
噚日喺中環鏞記四樓嘅春茗果然好墟冚，好多行家都畀面，賓主盡歡。
啱啱增添新家庭成員嘅財政司司長梁錦松一家，難免成為席間熱門談論話題。立法會秘書處中人講起一項傳統，以往財政司司長公布預算案時，其太太多數會坐喺立法會公眾席上作精神上支持。就好似特首宣讀施政報告，董太即使聽到瞌眼瞓，都由頭坐到尾。
舊年阿松重係單身漢，今年小伏都好難現身支持阿松，就算唔計小伏坐緊月，佢一出現，想搵人聽阿松講預算案都幾難。不過若果阿松唔想大家嘅焦點咁集中，就另當別論。
（圖）阿松宣讀預算案當日，相信唔會見到佢兩夫婦手拖手出現嘅場面。
傳真︰2623-9278
電郵︰