佐敦之虎早排公然向警方「宣戰」後，好多人話香港治安唔掂，訴苦Sam即刻附和，並大吐苦水。佢話旺角應該係全香港最多人高買「熱點」，門口舖一日唔見十件八件貨，實屬小事，不過最近離譜係強搶，訴苦Sam話佢老友喺「兆萬」地庫有間舖，有日黃昏時間最多人時段，兩個後生仔入到舖，揀啱成箱原箱MedicomBe@rbrick同兩盒馬騮仔Kubrick就好唔客氣抬走，店主想追出，但怕追咗出去冇人看舖，到時成間舖被人掃清光，惟有眼巴巴睇住賊仔抬走價值幾千蚊嘅貨。
後尾受害店主同其他同場老闆講起，原來好多人中過招，所以黃金時間最多人時最好起碼有兩個人以上看舖，班賊就唔敢咁落手。但係商場裏面唔係有「實Q」咩？訴苦Sam：「講真，班『實Q』細膽過你，出得幾千蚊糧，點會同你搏？肯幫你打電話報警或出庭做證人已經仁至義盡喇。」吓？唔係咁灰啩？希望警方拉完「扑頭黨」，跟住破埋呢班「商場大盜」。
主持人：大食Jack
八卦熱報：