美股周二大拗腰後，周三未能承接餘勢反彈，杜指再跌102點，收7806。趙飛雲心情即刻靚番，諗住恒指噚日有機跌穿9000，倉內Put輪扶搖直上。
港股噚日低開44點，剛好是近期低位9072，瞬即跌穿再創近期新低，趙飛雲心諗今次得米，點知恒指跌至9029急速反彈，抽回9120附近橫行，即月期指大局已定後，午市重要挾多轉，恒指升至9175才現回吐，最後升17點，收9134。
倉內恒指Put輪9556，由開市最高0.171元跌回0.146元收市，跌逾5%，主要是持續收縮溢價。趙飛雲左睇右睇，恒指仍係向下尋底嘅走勢，冇理由俾人震落車，橫掂9556仍有近20%利潤，一於再坐一會，按原定計劃以恒指升破9230作計數位。
恒指由去年12月至今，形態上若以下降楔形視之，底部支持目前在8967；若以平行下降通道量度，底部支持在8700。短期反彈阻力為2月25日下跌裂口9231至9154，10日線及20日線亦下降至9269至9241，反彈空間十分有限。
3月期指收9040，低水94點，較前兩日大為收窄，表面上屬利好訊號，但從淡友心態睇，期指低水收窄，可能係反映滙豐（005）及恒生（011）的派息未必如之前預計咁高，又或者係大戶震淡倉。不論美股或港股嘅走勢，現水平應仍未見底，短線超賣縱有反彈，但力度不會太強，係典型彈散市。
趙飛雲