搞到滿城殺聲四起嘅《真‧三國無雙3》就剛剛推出，雖然熱賣但係好多機迷亦歎廠商狂以續集掛帥搶錢，而喺3月6日推出嘅《CHAOSLEGION》雖然同係動作Game，不過加入咗大量新元素相信會畀到驚喜大家。今個星期亦係PS2推出最多大作嘅一周，《WinningEleven6國際版》行貨由於係亞洲專用關係，市價約$340-$350左右，《StarOcean3》由於行貨同日版價錢相差頗遠（日本版約$450-$490，行貨$365），相信行貨會有升價壓力，《櫻花大戰》同《電車Go!Professional2》由於同日本版一樣包裝，所以賣價比一般行貨定價高，前者普通版約$430-$450，後者則$360-$390，今次《櫻花大戰》遊戲DVD會用上D9格式，有興趣好盡早購入。
PS2《頭文字D》延期至6月，傷盡車迷心，不過昨日推出嘅《街道Battle》絕不能睇小，呢隻由《首都高》系列嘅GENKI廠開發，相信係呢個星期嘅黑馬，市價約$390-$420左右。
XBOX2月份遊戲真係唔係咁多，令到好多機主無Game玩，不過3月開始行貨遊戲亦會多番，好似3月頭由洲立代理推出嘅《APEX》會係高水準賽車遊戲，而MS嘅格鬥遊戲《TAOFENG》更會同美國版差唔多時間推出，有興趣不妨留意，據微軟消息亞洲版XBOXLive相信會於年內登場。
美版推出多時嘅任天堂招牌作《銀河戰士METROIDPRIME》，前兩日終於推出日版，呢隻被選為上年美國全年最佳GC遊戲，相信有機嘅冇理由唔玩，現市價約$380-$410。至於名製作人三上真司監修嘅GC遊戲《PN03》確定會有行貨，3月27日發售，定價$380。