滙豐銀行總經理柯清輝噚日出席港台「十大好書」推介會，平日慣於講金嘅柯總，原來真係標準「金」迷，佢推介嘅好書就係金庸嘅《射鵰英雄傳》。
話說一九六二年初讀此書，當時柯清輝正值會考搏殺之際，但金庸著作魅力沒法擋，一旦沉醉於武俠世界，點能抽身而出？幾經掙扎之下，最終都係刨完射鵰再預備考試，咁佢會考成績如何？柯總笑笑口話係私隱，不能披露。
金庸筆下女角個個容顏清麗，天賦異稟，其中玲瓏剔透嘅黃蓉，就成為柯清輝最喜愛嘅女主角，神馳《射鵰》日久，佢話自己擇偶時，不知不覺都可能將黃蓉嘅影子，投射喺心儀對象上。八方一早聽聞柯太係好多人嘅偶像，佢同柯總雖然製造咗咁多件結晶，身材依然極Fit，原來柯總早具慧眼，睇出黃蓉嘅特質。
柯總話金庸文字工夫到家，射鵰人物角色塑造深刻，惹人鍾愛，即使如東邪黃藥師，雖然「邪邪哋」，但亦邪得可愛有性格。
柯總這邊廂介紹好書，那邊廂滙豐控股就有獎攞。滙控一直係香港股市嘅「大笨象」，但係《遠東經濟評論》評選「香港最佳公司」，連續九年冇佢份，今年先至爭到個冠軍，原來《遠東經濟評論》以前當佢係英國公司，家陣至當佢係香港公司。
講開攞獎，渣打銀行噚日都攞咗「香港優質顧客服務協會」三個獎，其中一個係「最傑出服務個人獎兼服務個人獎（熱線電話服務）金獎」，得獎者係伍偉良，斷估把聲會幾好聽，唔知佢可唔可以一口氣讀出呢個長氣獎名？
傳真︰2623-9278
電郵︰