期指結算日前夕，好友淡友算係和氣收場，恒指高低波幅唔大，埋單微跌32點。
電訊股跌勢轉緩，和黃（013）收46.30元，跌20仙，估計就有技術性反彈，和黃Call輪開始搵啲收集，博跟正股反彈。9665最啱短炒，6月到期，現價25仙，溢價9.1%，槓桿率18.5倍；其次9666，又係6月到期，現價29.5仙，溢價9.0%，槓桿率15.7倍。賭和黃Call輪，賭得嚟唔想咁刺激，則諗隻9606，8月到期，現價70仙，溢價1.5%，槓桿率6.6倍，但隻輪最大缺點係交投非常疏落。
昨日渣打（2888）除息2.566元，收85元，唔計息，跌2.25元，計埋息，實升31.6仙。Call輪例牌冇息收，隻渣打Call輪9592，收49.5仙，大散21%，5月初到期，溢價3.6%，槓桿率17.2倍。渣打近期累積升幅大，博喺兩個月內再升3.10元（相等於隻輪嘅溢價），不切實際，隻輪唔博得過。
美日滙價Call輪9420，昨日喘定。2月11日到𠵱家，9420由26.5仙散到10仙，呢段時間，1美元由兌121.9日圓跌到兌117.2，弱得好交關，有機會反彈，9420可以細細注吼吓，博跟埋美元（兌日圓）反彈些少。
章盛