港府噚日公布整個投資移民政策，原來香港居留權只值650萬元。香港以往一向是冒險家想賺錢嘅樂園，好多移民海外嘅港人回流，只因香港搵錢機會多，並非想回香港定居。若果要移民，阿虎都搵人口唔稠密而又美麗嘅城市啦，真係好難想像投資移民政策，點樣可以支持本港樓市同股市？睇嚟港府救市嘅招數真係用盡。
港股反覆下跌32點，9100重叫守得住，恒指收報9116，成交41.74億元。3月期指持續大低水126點，收報8990，未平倉合約增加至近4萬張，即月期指結算後，3月港股真係有排捱，單係中移動（941）喺成都減價50%兼實行單向收費政策，就足以刺激芬佬繼續狂掟中移動、中國聯通（762）及中國電信（728）。
中遠太平洋（1199）傳出就快賣得成10%內河碼頭權益，噚日股價逆市上升2.1%，收報7.25元，成交亦大增至1.07億元。據聞，中遠唔止想賣內河碼頭，重想賣埋廖銀（1111）20%股權。有消息話，中遠同廖企（194）傾過，睇吓廖企有冇興趣買番20%廖銀股權。不過現時廖企要重建總部，加上地產市道同銀行業務前景又唔理想，當然冇睬佢。
鄭州燃氣（8099）最近升至0.60元開始回頭整固，但噚日又有發力迹象，逆市升3.6%，收0.58元。原來公司獲得工行5億元人民幣備用貸款額，資金充裕，公司隨時會進行一連串收購行動，刺激股價上升。
品質國際（243）配售交易，罕有地因為要核實承配人身份而要延遲至3月7日完成。據聞，聯交所對承配人的獨立性有所質疑兼諸多留難。之前品質宣布配股後復牌，股價曾挫逾10%，如果配售告吹，唔知會唔會來個挾淡倉呢？
阿虎