喺足球比賽裏面，做英雄定狗熊只係一腳之差。曼聯中場傑斯兩次射爆祖雲達斯，立即由狗熊變英雄嘞，但多蒙特前鋒阿武羅素只係甩咗一腳，就由英雄變成狗熊。
多蒙特喺前晚對皇馬守足九十分鐘，點知去到補時因後備入替嘅阿武羅素喺前場一次錯誤，搞到佢哋俾皇馬追和一比一。多蒙特教練森馬就咁話：「如果唔係換走左翼衞戴迪，呢個情況就唔會發生。不過，阿武羅素喺前場失咗個波，應該去追番對手，所以佢要為球隊失分負上一部份責任。」
雖然我求大俠覺得森馬咁講有啲過份，但係阿武羅素佢真係唔抵幫。雖則佢上屆幫球隊攞咗德甲聯，但弊在份人太過英雄主義。上季佢就試過因為不滿被換出而幾乎同森馬講手；而喺上個禮拜六對史浩克04時喺中場扭失波，之後又唔追番，搞到自己隊波個龍門列文同佢動粗而俾球證趕出場。
踢波係團體運動，個人嘅錯誤好容易令成隊波付上沉重嘅代價。我求大俠希望阿武羅素經過今次教訓之後，下次可以醒啲啦！
正所謂衰開有條路，祖雲達斯唔單止因為犯三個大錯而輸波，老將費拉拿重響比賽中掛彩，比隊友杜林用鞋底印咗一吓，即時血流披面，後嚟以一個白頭嚤囉look頂到完場。講番杜林嗰腳波，我求大俠唔知佢做乜起腳咁高，希望佢唔係老羞成怒想踢雲尼斯達羅而誤中隊友，如果係就真係無品嘞。
我求大俠噚日講過，韋斯咸唔同迪肯尼奧續約，搞到兩者關係愈趨惡劣。不過迪肯尼奧唔使擔心下季無好路數，佢位前度伯樂哈利列納帶緊嗰隊樸茨茅夫，來季九成升班，哈利列納亦表明想簽番呢位好波之人，到時可能迪肯尼奧重喺超聯搵食，韋斯咸就要喺甲組浮沉咯！
上季以十八個聯賽入球，成為德甲聯其中一個神射手嘅波勒，今季轉咗會去拜仁慕尼黑之後產量大跌。近日呢位德國國腳就呻話係教練希斯菲特嘅不當戰術，令佢無法入多啲波！我求大俠就睇唔過眼，踢波係講整體唔係個人，你隊波有艾巴及比沙路呢啲射手喺度，加上目前聯賽一枝獨秀，睇吓你前度球會利華古遜𠵱家幾慘，真係身在福中不知福！
呢排東岸榜首三支班霸唔知係唔係後勁不繼，頻頻輸波兼輪盤，好似喺噚日咁，東岸三大龍頭活塞、網隊同溜馬齊齊輸波，結果搞到活塞四連敗、網隊三連敗、溜馬五連敗，害到近排呢三隊嘅捧場客個個輸到一仆一碌，我求大俠奉勸各位球迷呢排最好少掂呢三隊波為妙。