松哥與國寶嘅愛情結晶品，即將出世，金融界盛傳啤啤喺二月底出生，更有人言之鑿鑿，話定於二月二十六日於瑪麗醫院由鄧醫生（女）剖腹取女，大概本文見報之日，已有分曉。松哥與霞妹係全城記者密切注視嘅對象，記憶之中，過往咁耐冇一位高官在任內做爸爸（因為做到高官，年紀已有番咁上下，仔女已經大咗），松哥算係創造歷史，記者搶漏新聞或漏拍啤啤鏡頭，輸畀對手，肯定難逃老細訓話，因兩大報已各派兩隊人喺瑪麗與壽臣山全天候紮營也。
正因如此，大家都咁緊張，星期一就發生笑話。大編輯話：「好似財爺方面有人同記者講，是日財爺與寶baby見面，可能口齒唔清，或者記者聽錯！變成『財爺抱baby見面。』記者一聽，即刻傳開去，眾記者立即飛車去壽臣山財爺官邸，等財爺抱baby出嚟畀記者影相。點知等極都唔見，居然等到李國寶議員，人稱寶baby，在現場出現，入內與財爺午膳！」
左丁山笑到碌地之餘，除咗覺得傳媒極度緊張，驚死執輸之外，亦覺得啲官唔好學人調皮，講名應該清楚明白，要講：「李國寶議員」，不能人講花名，你又講花名，叫尊貴議員做「寶baby」啫！有此誤會，搞到記者一場虛驚，寶哥哥莫名其妙！講開又講，梁錦松請李議員食飯，究竟傾乜嘢呀？大編輯猜度係講財赤，政治編輯就估係傾廿三條，葉劉同李議員傾，好容易弄僵，松哥與寶哥哥都係賓架，大概容易啲對話啩？