荷李活男星班亞弗力（BenAffleck），呢期因為同籮霸珍妮花洛庇絲（JenniferLopez）拍拖，俾人喺背後笑到面黃。早排重有傳聞，話班仔個老死麥迪文（MattDamon）為咗勸佢遠離籮霸，兩兄弟搞到反晒面。最近呢兩兄弟重齊齊瘀咗隻眼，唔知佢哋係咪互片嚟呢？
話說麥迪文早兩日喺新片《StuckOnYou》位於洛杉磯嘅片場俾人見到左眼眼腫腫，記者梗係問佢係咪好痛啦，點知麥迪文好晦氣咁話：「係呀！」之後重粒聲唔出咁走咗。片場嘅人話，麥迪文死都唔肯講點解受傷，搞到大家都好似我羅拉一樣，估緊佢究竟係俾女友打，定係同傷咗隻右眼嘅班仔開過片嚟。
另一邊廂，籮霸前日去咗西班牙馬德里宣傳新片《五星級戀人》，佢呢兩日心情都好靚，日日笑臉迎人，不過佢遲啲返到美國，見到班仔隻右眼瘀咗一大撻嗰陣，你估佢有冇咁好笑！