經紀陳上個月底，同小初講過毅興行（1047）開始有鑊氣，可以留意。小初舊時炒毅興行輸過錢，對隻股有啲戒心，所以聽過就算，直至噚日睇報紙，睇到主席在一單母子爭產案中出任證人，跟住再睇吓股價，先知已經升到1元水平。
原來毅興行近期最高見過1.06元，噚日就平收1元，但可惜係成交始終唔夠多。經紀陳就唔係咁睇，佢話隻股一直由天下第一莊嘅舊拍檔打理，近排流行炒工業股，以毅興行7.8倍PE，同埋周息率有成7%，其實好啱玩工業股嗰班投資者嘅口味，所以隻股近排嘅交投，漸漸開始由私人派對格局，轉變為多咗其他人參與。
經紀陳重話，幕後人近期非常努力做公關工夫，一旦吸引到芬佬重投懷抱，毅興行股價其實高處未算高，假如小初仍然對毅興行有戒心，就不如留意另一隻舊年俾歐資行踢高嘅毅力（332），隻股噚日無端端又被歐資行掃高，大升7.3%，收2.20元，睇迹象可能係一次短線開車訊號。
慕容小初