梁錦松伏明霞嘅愛情結晶品終於出世，噚日觀音開庫，一定係好日；老來得女，阿松心情都唔慌輕鬆，加上噚日立法會內你一言我一語，當時重等緊Baby出世之準爸爸，都唔知聽得邊個講。
引起過美麗誤會嘅寶Baby李國寶好開心。佢話唔知阿松叫佢做Baby，又話相信阿松因為太掛住自己個Baby，所以先咁講，講吓講吓，寶Baby笑笑口：「佢可能覺得我好可愛！」
馬時亨局長喺立法會前廳捉住阿松密密斟，原來佢建議個老友一定要入產房陪太太經歷分娩過程，因為Bonding（同仔女嘅感情聯繫）會好啲喎；唔知阿松怕唔怕血呢？馬仔後來又話會同其他局長夾份送份BB用品做賀禮。使唔使咁慳皮呀？
議員麥國風就忽然變身心理專家，話小伏懷孕會對阿松造成好大精神壓力，就算之前照晒超聲波，都要親眼見到Baby平安無事出世，先會安心。
阿松嘅同學蔡素玉，話最佳賀禮就係三月五號預算案投支持票，又話阿松如果肯年年生BB，紓緩人口老化，佢就年年都投支持票。「叉燒」蔡又笑住話，會送套泳衣畀BB女，希望伏明霞由細訓練小霞女，做香港第一個土生土長嘅跳水皇后。
八方就覺得，最有心都係曾蔭權，揀正松嫂生女呢一日公布處心積慮、搞咗好耐嘅人口政策報告，話畀大家知要有錢至好返大陸娶老婆生仔，否則綜援都要等七年。如果唔明報告內容，可參考阿松做例子。你話特區高官幾合作無間呢。
傳真︰2623-9278
電郵︰
