電影《無間道》票房收五千幾萬，今屆金像獎又有十六個提名，可以話係威到盡，但係坊間就話呢套戲其中一場，係抄好多年前嘅電影《辣手神探》。
《辣》片由吳宇森執導，周潤發做警探，而梁朝偉又係做卧底，其中一場戲講偉仔同上司陳欣健交換情報，就同《無》入面黃秋生同梁朝偉喺天台嗰場戲好鬼似。
呢場戲有五個地方相似，首先係兩者都喺大廈嘅天台發生；第二係會面嗰日都係梁朝偉生日，唔同係陳欣健買咗個打火機送畀偉仔，而秋生就送手表；第三係偉仔對於上司記得自己嘅生日表現驚奇；第四係偉仔話自己唔想再做卧底，而上司就叫佢盡快破案；第五就係陳欣健同秋生都係唯一知道偉仔係卧底身份嘅人，而且隨時可以取消偉仔喺差館嘅檔案。
港產片有時都會互相抄襲，又會抄吓西片，不過《無》呢場咁似《辣》，似乎真係幾巧合。
章小蕙噚日去銅鑼灣巡視業務，佢着住英國品牌SaraBerman新裝出現，原來佢啱啱去完紐約同倫敦，章小蕙話：「我做時裝好似做戰地記者咁，嗰邊氣氛好緊張，人人怕打仗，又掃罐頭同水。」談到博士生男友，章小蕙話男友送咗把軍刀畀佢傍身。另外，早前有雜誌選章小蕙為「最差情人」，佢話：「係咩？我今年係桃花女，我享受花心同單身。我係理想情人嚟㗎，不過唔可以獨家代理啫。」
梁朝偉早前推出嘅專輯《風沙》啱啱喺內地面世，雖然偉仔已經暫別樂壇三年，但到現時為止，大碟已經喺內地賣出二十萬張，有咁驕人嘅成績，偉仔當然要乘勝追擊。佢最近就計劃喺拍攝完由王家衛執導嘅電影《2046》後，舉行內地巡迴演唱會，到時重會請埋劉德華同張曼玉兩位好拍檔同台演出，真係令人期待！
鄭中基（Ronald）噚日去港台接受訪問，Ronald一向有鼻竇炎，佢噚日朝早鼻膜發炎又走去睇醫生，問佢點解會發炎，Ronald就好搞笑咁話：「因為我鼻毛過長，我唔想次次剪，咪用電動鼻毛剪一次過剪短啲囉，點知醫生話我剪得短得滯，吸晒啲塵發炎，痛到頭赤。」Ronald重話佢以前試過剪剪吓鼻毛，部機冇電，搞到卡住喺個鼻度，Ronald話：「好彩我屋企有電芯，唔係唔知點攞住部機去便利店買電。」
向海嵐噚日喺將軍澳電視城拍攝無綫新劇《生命天使》，自從成為纖體公司代言人之後，向海嵐身材真係愈嚟愈弗，佢話：「雖然我同皇室纖體已經約滿咗，但佢哋依然會贊助我上去keep住做纖體。而且嚟緊我哋重傾緊可能會喺巴士上面播我段片，不過未知傾唔傾得成。」
