美股又再表演拗腰絕技，港股有樣學樣，點知一拗就拗傷，倒跌收場。恒指在60多點內上落，收市9116，跌32點，總算重守穩在9100點大關之上，成交再縮，只得41億元，沽壓唔大，投資者亦唔願入市。3月期指收8990，繼續大低水。
大市雖反覆走軟，但上升股有245隻（不計認股證），比下跌股217隻為多，升降指數維持強勢，短期炒個別仍有小作為。中外運（598）終突破2.35元阻力，高成2.4元後收2.375元，短期可向2.5元推進。太平協和（438）前日0.5元樓下任你買，噚日就搶到上0.53元，收0.52元，大升3仙，短期目標仍為0.58元。
中海發展（1138）收1.93元，升2仙，升勢已一觸即發，一破1.97元阻力，2.2元在望。TCL（1070）繼續見基金明㩒暗收，基本條件好，遲早開車。噚日有消息，話海爾中建（1169）有料到，股價亦對辦，升6%，走勢突破旗形，照度上去，最少見15.5仙。
自然美（157）係一隻被人遺忘已久嘅股票，但呢幾日又有番人氣，上周五急升後，唞咗兩日，噚日又再郁過，收0.61元，升4仙。近兩個月，自然美走勢形成雙底，頸線在0.59元水平，噚日成交再大增，係02年5月以來嘅最高紀錄，動力強勁，破位可期，以量度升幅計，目標指向0.8元。
自然美係一家台資美容產品公司，主攻大陸市場，在內地發展已10年，在台灣亦有15年歷史，業務持續有穩定增長。去年3月底上市發售5億股，售價0.55元，上市後一度成為熱門當炒股，股價曾一度上升逾倍，股民相信還記得，當時有一家大行推薦買入，令升勢火上加油。
自然美基本條件不俗，股價回落到上市價水平，又有留意價值。02年度的上半年，集團營業額1.4億元，增長39%，盈利2907萬元，大升86%，由於美容產品在秋冬兩季需求較大，銷量通常為上半年兩倍以上，估計02年盈利可達9000萬元，增長26%，每股盈利4.8仙，PE12.7倍，03年度將可再調低至7倍，相比法國和日本同類公司平均PE20倍，自然美肯定有吸引力。
郭兆誠