大道中馬莎百貨附近一間珠寶店Hsudia搬遷，拆清裝修之後，立即見另一間時裝舖裝修，好快就開業。你話零售市道弱喎，繁盛區域啲地舖重係幾吃香㗎，又或者，賺女人錢比較容易，所以時裝店不斷進佔旺舖。香港新一代女士，明顯地比男人佔上風，由小學一年班至大學，女生都把男生拋在後頭，淨係講人數，已經佔盡上風啦。以大學女生人數推論，未來中環高級白領，專業人士必係女人世界，男人成為minority。喺中環開時裝店，啱晒波路，中環嘅高級男士用品店，要逐漸收縮咯。
置地廣場一間西餐廳，聽講月尾結業，餐廳價錢唔平，唔夠生意，並不稀奇，反而陸羽對面嗰間魚湯米線，生意好到出奇，每日中午時份，門口都企滿三四十人，兩點後先至散晒；左丁山好想入去試吓，滿足好奇心，不過見到咁多人，都無謂同人去逼餐死。
每日行過大道中連卡佛，只見靜英英，究竟裏面有冇人客㗎？早前睇到吳光正家族信託向會德豐購入連卡佛及Joyce嘅新聞，連卡佛嘅一年生意做幾億，竟然要蝕本，以往嘅盈利亦唔見得有好多，呢間老牌名店，以後點樣維持呢？回歸後嘅五年半經濟衰退，陰啲陰啲，好難捱，百年老店已面對空前挑戰。記得左丁山出道之時，每年趁連卡佛大減價，都湧入去同其他中環人搶貨（當然係最平嗰啲），係一年一度嘅興奮節目。𠵱家有資格行入去慢慢揀，竟然已經失去興趣，喺門口直行直過，經濟氣壓甚低，令人shopping興趣盡失。