趙飛雲近排夜看美股之餘亦睇亞視嘅水滸傳，成日都聽到及時雨宋江嘅名，估唔到周一晚美股亦為淡友扮演及時雨，杜指大跌159點，跌幅2%，收7858。
上周五港股大戶已回復淡友真面目，雖然當晚美股3大指數好奇怪咁同升1.3%，但港股周一不升反跌，已見淡友控制大局。周一晚美股大跌，嘔突上周五升幅，淡友噚日自然趁勢出擊，恒指尾市雖有反彈，但仍跌90點，收9148。即月期指低水36點，3月期指更跌穿9000，收8997，大幅低水151點，睇嚟今次大戶唔輕易放生好友。
倉內嘅恒指Put輪9556終於守得雲開見月明，上升21%，收0.155元。噚日市場充斥利淡消息，美股期指亦繼續偏軟，趙飛雲唔心急食胡，望恒指向下突破近期底部9072再尋底，下試去年10月低位8772，到時9556將會大豐收。
恒指噚日以裂口拋離10及20日線，陰陽燭圖類似長尾十字星，短期或有反彈，但弱勢已成，相信反彈幅度有限，會止於9230至9290區域，倉內恒指Put輪9556以9230作止賺位，沽出後若見恒指升不破20日線9290，補回恒指Put輪，但換馬至年期較長的9587。
港股目前僅靠滙豐（005）支撐大局，噚日仍守20日線83.125元之上收市，報83.75元。若滙豐亦20日線失守，將下試近期底部81.25元，足以令恒指跌穿9000。
趙飛雲