由徐熙媛（大S）、宣萱及陳曉東主演的台灣劇集《倩女幽魂》，在大理取景拍攝以來，先有東東皮膚敏感、宣萱因急性胃炎須入院，昨日大S在拍攝中途亦突告腹痛難當，入院後證實為吃下不潔食物及疲勞過度所致。
徐熙媛、宣萱及陳曉東早前在番禺完成台灣劇集《倩女幽魂》的外景拍攝後，早前已轉往雲南大理繼續拍攝，但三位主角竟先後在當地病倒，非常當黑。
東東早前才於雲南患上皮膚敏感，日前女角宣萱又因急性胃炎而須入院，昨日大S在大理一影城內，與東東演對手戲時突感腹痛，工作人員見狀馬上將她送往大理人民第一醫院，其後再轉往規模較大的大理州醫院診治。
大S經檢查後，曾一度被誤為腹膜炎，但昨晚院方的報告證實大S因吃下不潔食物、疲勞過度，以及受當地稀薄的空氣影響，結果長期茹素的大S難再支持，不過她在昨日傍晚已出院。而大S早已向劇組度期今日返台工作，故她今天仍會從大理來港轉機赴台，然後在台灣治療。
昨日本報聯絡上身在大理的宣萱，她透過長途電話承認自己曾入院，她說：「幾日前我急性胃炎，個胃反反哋，係咁抽住痛，我入咗醫院吊點滴，吊咗四個鐘，休息咗一日，但到𠵱家都未好番晒。」問她知否大S病倒入院？她說：「我知佢病咗，但唔係太清楚佢嘅情況。」
《倩》劇的監製楊紹鴻昨日在電話中則說：「大S今朝唔舒服，佢好肚痛，其實佢一路都忍住，後尾真係支持唔到，我哋就送咗佢入院，檢查過話佢腸胃有事，本來醫生想佢作進一步檢查，但佢聽日要返台灣，所以佢應該會喺台灣再睇醫生。」
由於三位主角均告病倒，未知該劇會否再次拜神求心安？楊紹鴻說：「大S喺下月頭會再返大理拍嘢，到時齊人，我哋會再搞拜神儀式㗎啦。」