如果用錄音機錄下今次的訪問內容，特別是老闆娘Stella得知與攝影師都諗過類似的領袖培訓課程後，只會聽到Stella好似跳線唱機咁不斷重複「好正」，表現這位美麗孕婦的興奮指數維持在最高水平。就係呢股氣，Stella與丈夫Willi在去年六月學以致用，達成開設餐廳的夢想，隨着新生嬰兒即將誕生，加埋開業首度轉餐牌，生活又添新景象！
記者：邵超 攝影：陳永邦
逢星期一至五刊出
Cafe14.5開業已有九個月，其間差點失去即將誕生的小生命後，丈夫Willi嚴禁Stella操勞，痛惜之情表露無遺 ，亦因為自己有了身孕，多了時間在家湊女，才開始珍惜家庭，甚至周日休舖蝕本亦在所不計。
Stella與Willi本身識食唔識煮，由文員轉搞食肆，好彩遇到個出身自酒店的師傅，不然碰釘更多，甚至向客人介紹菜式都係只知菜名而唔識菜式的特色所在。但係因為讀過一個領袖課程，學識點樣面對難題，起碼解決咗情緒問題，做事變得特別起勁。熟客都知道餐廳的名字14.5，是指Stella就讀的第十四班和Willi念的第十五班，餐廳門口一塊窗帘，掛上多屆學弟妹為畢業而製作的手做絨布公仔。
開業不足一年，要學的事情還有很多很多，不過每天都過得很充實。「近嚟開始逢星期日休息，因為發覺七日之中呢日生意最差，倒不如關門，大家都可以休息吓。」
Cafe14.5的主要成員除Stella夫婦外，還有Willi的家姐和細佬，以前大家連食團年飯也要分開吃，現在每星期也有家庭日，帳面上是賺少了，但賺到了與家人相處的機會。原來只要擁有少一點，你可以獲得更多。
翻看Stella去年跟領袖課程的同學慶祝八月壽星的照片，發覺𠵱家佢好似後生咗又精神咗，原來「大肚婆係最靚」呢句說話係真嘅。Stella非常貪靚，懷孕都要穿得特別漂亮，實行做個漂亮媽媽。自從懷孕後，餐廳又換新菜牌，Stella覺得人生又踏進另一個階段，與囡囡的關係更加密切。
「囡囡𠵱家四歲，未大肚前好少陪佢，都係菲傭湊，以前諗寧願後生捱吓，好過老嚟至辛苦。」Stella鍾意講嘢，笑住話五月生完BB後要復出，我提議開個復出演唱會！不過Willi咁緊張老婆，復出之期起碼等半年。至於下個大計，當然係繼續生BB，只不過呢個BB係指Cafe14.5的分店。
夠滑溜有香草味
早前的鱸魚大受歡迎，新菜牌加入滑溜無比的比目魚，配埋龍蝦仔的海鮮味，兩者皆鮮味，最正係下面的燒南瓜，加入thyme草燒，又係唔同層次嘅鮮味。
微酸略帶鹹
沙律誰不愛吃？微酸的番茄片配上略鹹的吞拿魚，清新宜人。
好似飲咖啡酒
特別加上餐廳名字在前面當然是重點推介貨，師傅按照傳統的味道炮製家庭風味的Tiramisu，放在馬天尼杯裏，就好像飲一杯咖啡酒。
地址：銅鑼灣駱克道460號地下
電話：25756128
營業時間：12:00nn-12:00pm