美股唔掂，港股跟埋。油價上升，石油股有運行。中石油（857）升2仙，升幅細過中海油（883）同中石化（386），噚日所提嘅中石油Call輪9361升幅近9%，數據靚，未升得夠。
全市升幅最大嘅窩輪，係中海油Call輪9511，收9.4仙，升幅49%，由相關正股升35仙所帶動。9511今年4月夠鐘，溢價13%，槓桿率114倍。時日無多，咁嘅溢價屬高危輪，最後值唔值錢都成問題，行使價12元，正股𠵱家至係做緊10.70元。
恒指埋單唔見90點，恒指Put輪意氣風發。9559收8仙，升38%；9556收15.5仙，升21%；9557收8.1仙，亦升21%。呢3件至威水嘅恒指Put輪，都係3月底夠鐘，暫時嘅優勢係3月期指低水，所以計算溢價嗰陣要計埋呢個因素，3月期指低水則係因為滙豐（005）同恒生（011）到時除息，會拖低恒指。恒指𠵱家9148，估計9字齊頭可以一守，賭恒指Put輪贏多些少最好袋錢離場。
彩星（635）昨日再升12%，收82仙，認股證1119收50仙，升16%。隻輪明年5月夠鐘，負溢價2.4%，但唔代表博得過，原因係槓桿率只得1.6倍，同埋正股升到過晒火位，由去年10月起，正股已暴升4.5倍，隨時有回吐。
章盛